ဘုံတိုဆီမီးသပိတ်လေကြောင်းတိုက်ခိုက်ခံရမှု (၁) နှစ်ပြည့် ဝမ်းနည်းခြင်းသပိတ် ပြုလုပ်

အောက်တိုဘာ ၂၅၊၂၀၂၆။သုည/People’s Spring

စစ်ကိုင်းတိုင်း၊ ကလေး၊ ဘုတလင်၊ ရွှေဘိုနဲ့ လက်ပံတောင်းတောင်ဒေသတွေမှာ တော်လှန်သပိတ်အင်အားစုတွေ၊ ဒေသခံပြည်သူတွေက ဘုံတိုဆီမီးသပိတ်လေကြောင်းတိုက်ခိုက်ခံရမှု (၁)နှစ်ပြည့် ဝမ်းနည်းခြင်းအဖြစ် သပိတ်လှုပ်ရှားမှုတွေကို ဒီကနေ့ (အောက်တိုဘာ ၂၅) ပြုလုပ်ခဲ့ပါတယ်။

စစ်ကိုင်းတိုင်း ဆားလင်းကြီးမြို့နယ် လက်ပံတောင်းတောင်ဒေသမှာ ပင်မသပိတ်အင်အားစုက ဦးဆောင်ပြီး ဘုံတိုဆီမီးသပိတ်လေကြောင်းတိုက်ခိုက်ခံရမှု ၁ နှစ်ပြည့် ဝမ်းနည်းခြင်းအထိမ်းအမှတ်အဖြစ် “သွေးမြေကျခဲ့တဲ့ သစ္စာတရား၊ ဆီမီးများနဲ့သယ်ဆောင်သွား” စာသားနဲ့ သီတင်းကျွတ်လှုပ်ရှားမှု ဓာတ်ပုံကမ်ပိန်း ပြုလုပ်ခဲ့ပါတယ်။

ကလေးမြို့နယ် ကျေးရွာတစ်ရွာမှာလည်း လူထုတိုက်ပွဲဦးဆောင်ကော်မတီက ပြည်သူ့ပညာရေးသပိတ်စစ်ကြောင်းနဲ့အတူ ၂၀၂၅ ဘုံတိုဆီမီးသပိတ် လေကြောင်းတိုက်ခိုက်ခံရမှု (၁) နှစ်ပြည့် ဝမ်းနည်းအောက်မေ့သတိရခြင်းအထိမ်းအမှတ် “သွေးစည်းညီညွတ်ရေး ဆီမီးသပိတ်” ကို ပြုလုပ်ခဲ့ကြပါတယ်။

Public Service Announcement

ဘုံတိုဆီမီးသပိတ် လေကြောင်းတိုက်ခိုက်ခံရမှုမှာ ကျဆုံးခဲ့ရတဲ့ သပိတ်ကော်မတီအဖွဲ့ဝင်တွေ၊ ရဲဘော်ရဲဖက်တွေ၊ ဒေသခံပြည်သူ​တွေ၊ ကျန်ရစ်သူ မိသားစုဝင်တွေနဲ့အတူ ထပ်တူထပ်မျှ ဝမ်းနည်းရကြောင်းလည်း ကလေးလူထုသပိတ်က ဖော်ပြခဲ့ပါတယ်။

ဘုတလင်မြို့နယ်မှာလည်း သပိတ်အင်အားစုဝင်တွေက ဘုံတိုဆီမီးသပိတ်လေကြောင်းတိုက်ခိုက်ခံရမှု ၁ နှစ်ပြည့် ဝမ်းနည်းခြင်းအထိမ်းအမှတ်အဖြစ် “သွေးမြေကျခဲ့တဲ့ သစ္စာတရား၊ ဆီမီးများနဲ့သယ်ဆောင်သွား” စာသားနဲ့ သပိတ်လှုပ်ရှားမှု ပြုလုပ်ခဲ့ပါတယ်။

ရွှေဘိုမြို့နယ်မှာလည်း သပိတ်အင်အားစုက ဦးဆောင်ပြီး တော်လှန်အသိ တော်လှန်သတိရှိသော တော်လှန်လူထုက ဆီမီးသပိတ် ပုံဖော်ထွန်းညှိကာ မြန်မာပြည်ကြီးအမြန်လွတ်မြောက်ပါစေကြောင်း ဆုတောင်းခဲ့ကြပါတယ်။