ရန်ကုန်မြို့ မြောက်ဥက္ကလာပမြို့မရဲစခန်းအား ယနေ့(ဒီဇင်ဘာ ၃၁)ည ၇ နာရီကျော်က တိုက်ခိုက်ခံရမှုဖြစ်ပွား ခဲ့ကြောင်း ဒေသခံများက ပြောသည်။
မြောက်ဥက္ကလာပမြို့နယ် မြရတနာလမ်းထိပ်ရှိ မြို့မရဲစခန်းအတွင်း ဖောက်ခွဲတိုက်ခိုက်ခံရခြင်းဖြစ်ပြီး ထိုသို့တိုက်ခိုက်ခံရပြီးနောက် ရဲစခန်းအတွင်းမှ စစ်ကောင်စီလက်ပါးစေရဲများက ရပ်ကွက်အတွင်း ရမ်းသမ်းပစ် ခတ်မှုများလည်းရှိနေကြောင်း ၎င်းတို့က ဆိုသည်။
“စခန်းကိုလာဆော်သွားတာ အုန်းခနဲပဲ”ဟု အဆို ပါ ရဲစခန်းအနီးရောက်ရှိနေသည့် ပြည်သူတစ်ဦးက ပြောသည်။
ထိုသို့တိုက်ခိုက်ခံရခြင်းကြောင့် စစ်ကောင်စီလက်ပါးစေ ရဲစခန်းဘက်မှ မြရတနာလမ်းအပါအဝင် ဘုံမာလမ်းများဘက်အထိ လိုက်လံပစ်ခတ်မှုများရှိနေသည်ဟု ဒေသခံတစ်ဦးက ပြောသည်။
Public Service Announcement
“အခုပစ်နေတယ်။ ဘုမ္မာ ၃ လမ်းရောဘဲတဲ့။ ဖြစ်တာက မြရတနာထိပ် မြို့မစခန်းထဲ ဖြစ်တာ။ အသေးစိတ်တော့ မသိသေးဘူး”ဟု ၎င်းက ဆက်ပြောသည်။
အထက်ပါ ရဲစခန်းတိုက်ခိုက်ခံရမှုနှင့်စပ်လျဥ်းပြီး မည်သည့်အဖွဲ့အစည်း၏လက်ချက်ဖြစ်သည်ဆိုခြင်းနှင့် ထိခိုက်မှုရှိ၊ မရှိ စသည်တို့ကို မသိရသေးပေ။
