မြစ်ကြီးနားမှ အခြားဒေသများသို့ ညပိုင်းအသွားအလာ မလုပ်ရန် KIA သတိပေးချက်ထုတ်ပြန်

ကချင်ပြည်နယ် မြစ်ကြီးနားမြို့ မှ အခြားဒေသများသို့ ညပိုင်းတွင် သွားလာခြင်းမပြုလုပ်ရန် ကချင်လက်နက်ကိုင်အဖွဲ့(KIA) တပ်ရင်း (၁၁)က ယနေ့ ဇွန်လ ၂၅ရက် ရက်စွဲဖြင့် သတိပေးချက်ထုတ်ပြန်သည်။

KIA အမှတ် (၁၁) တပ်ရင်း မှ ၎င်းလှုပ်ရှားနယ်မြေ အတွင်း အခြေချနေထိုင်ကြသော ပြည်သူများ၊ စီးပွားရေး လုပ်ငန်းရှင်များနှင့် ခရီးသွား ပြည်သူများအားလုံးကို သတိပေးချက်ထုတ်ပြန်ခြင်းဖြစ်သည်။

မြစ်ကြီးနားမှ တနိုင်း၊ မြစ်ကြီးနားမှ ပူတာအို၊ မြစ်ကြီးနားမှ ဖားကန့်နှင့် မြစ်ကြီးနားမှ စစ်ကိုင်းတိုင်းသို့ ခရီးသွားလာနေကြသော မိဘပြည်သူများနှင့် ကုန်တင်ကားများ၊ ဆီဘောက်ဆာကားများ၊ အမျိုးမျိုးသော စီးပွားရေး လုပ်ငန်းသုံးကားများသည် ည ၇နာရီမှ နံနက် ၅နာရီ အတွင်း သွားလာခြင်း မပြုလုပ်ရန် သတိပေးကြောင်း စာတွင် ဖော်ပြထားခြင်းဖြစ်သည်။

သတ်မှတ်ထားသော နယ်မြေအတွင်း အိမ်စီးကားများ၊ ခရီးသည်တင်ကားများနှင့် အခြားလူမှုအဖွဲ့အစည်းများ၏ ကားပေါ်တွင် အာဏာသိမ်းစစ်ကောင်စီ တပ်ဖွဲ့ဝင်များ၏ စစ်ပစ္စည်း၊ လက်နက်ခဲယမ်းများနှင့် စားနပ်ရိက္ခာများ ၊ ယာဉ်သုံးဆီများ၊ စစ်ကောင်စီတပ်ဖွဲ့ဝင်များကို တင်ဆောင်ပေးခြင်းနှင့် မလိုအပ်ဘဲ မိုးကာအုပ်မိုး၍ သွားလာခြင်း မပြုလုပ်ရန်လည်း KIAက သတိပေးထားသည်။

Public Service Announcement

သတိပေးထုတ်ပြန်ချက်ကို မလိုက်နာပါက ဖြစ်ပေါ်လာသော ပြဿနာအရပ်ရပ်ကို လုံး၀ တာဝန်ယူမည်မဟုတ်ကြောင်း KIAက ဆိုသည်။