အမေရိကန် နိုင်ငံမှာ ရထားနဲ့ တိုက်မိအောင် တွန်းတိုက်ခံရလို့ လူတစ်ဦး သေဆုံးသွားတဲ့ ဖြစ်စဉ်ကို ရဲတပ်ဖွဲ့က စုံစမ်းနေကြောင်း သိရပါတယ်။
နှစ်သစ်ကူးနေ့က ဆန်ဒီယေးဂိုးမြို့မှာ ရထားနဲ့ တိုက်မိပြီး လူတစ်ဦး သေဆုံးခဲ့ပါတယ်။ ဒီကိစ္စဟာ သွေးရိုးသားရိုး မတော်မတဆမှု မဟုတ်ဘဲ အရှိန်နဲ့ လာနေတဲ့ ရထားဆီကို ရည်ရွယ်ချက်ရှိရှိ တွန်းပစ်တာ ခံခဲ့ရတာလို့ ဆန်ဒီယေးဂိုး ရဲတပ်ဖွဲ့က ပြောပါတယ်။
ပြီးတော့ သေဆုံးသူနဲ့ ကျူးလွန်သူတို့ဟာ ရန်ဖြစ်ထားတာမျိုး မဟုတ်ဘဲ ရုတ်တရက် တွန်းချလိုက်တာ ဖြစ်မယ်လို့ ရဲတွေက ယူဆထားပါတယ်။ ရဲတပ်ဖွဲ့ဟာ အခင်းဖြစ်ပြီးတဲ့နောက် ထွက်ပြေးသွားတဲ့ သံသယ တရားခံကို လုံခြုံရေး ကင်မရာ မှတ်တမ်းတွေ အကူအညီနဲ့ လိုက်လံ ရှာဖွေနေဆဲ ဖြစ်ပါတယ်။
သေဆုံးသူဟာ အိုးလ်တောင်း ဘူတာကနေအထွက် ရထားလမ်းဘေး ပလက်ဖောင်းပေါ် လမ်းလျှောက်နေတုန်း ရထား ဖြတ်မောင်းချိန်မှာ တရားခံက မပြောမဆို လှမ်းတွန်းတာ ခံခဲ့ရတာ ဖြစ်ပါတယ်။ သူဟာ အရှိန်နဲ့ မောင်းနေတဲ့ ရထားဘေး ကိုယ်ထည်နဲ့ တိုက်မိရာက ပြင်းပြင်းထန်ထန် ဒဏ်ရာရပြီး အသက်ဆုံးရှုံးသွားခဲ့ကြောင်း ရဲတွေက ပြောပါတယ်။
Public Service Announcement
သေဆုံးသူဟာ အသက် ၆၀ ကျော်အရွယ် လူဖြူ အမျိုးသား တစ်ဦးဖြစ်ပြီး ဘယ်သူဘယ်ဝါ ဆိုတာကိုတော့ ရဲတွေက မထုတ်ပြန်သေးပါဘူး။ ဆန်ဒီယေးဂိုး ရဲတပ်ဖွဲ့ဟာ အရပ် ၅ ပေ ၉ လက်မဝန်းကျင်၊ အသားရောင် ခပ်ဖျော့ဖျော့၊ ခပ်ပိန်ပိန် အမျိုးသား တစ်ယောက်ကို လိုက်ရှာနေပါတယ်။
လူသေမှုအပြီး စုံထောက်တွေ လာရောက် စစ်ဆေးနေချိန်မှာ အိုးလ်တောင်း ဘူတာကို ယာယီ ပိတ်ထားခဲ့ပေမယ့် နာရီပိုင်း အကြာမှာတော့ ပုံမှန်အတိုင်း ရထားတွေ ပြန်လည် ပြေးဆွဲဖို့ ခွင့်ပြုထားကြောင်း သိရပါတယ်။
