“ကေအဲန်ယူကိုမတိုက်နိုင်တော့ ကရင်ပြည်သူကို နှိပ်စက်နေတယ်”

◾️ ဖာပွန်မှာ လက်နက်ကြီးပစ်ခတ်မှု လေကြောင်းတိုက်ခိုက်မှုကြောင့် တစ်လအတွင်း ၇ ဦးသေဆုံး

ဖာပွန်မှာ စစ်ကောင်စီရဲ့ လက်နက်ကြီးပစ်ခတ်မှုနဲ့ လေကြောင်းတိုက်ခိုက်မှုတွေကြောင့် တစ်လကျော်အတွင်း အရပ်သားပြည်သူ ၇ ဦး သေဆုံးသွားခဲ့ပြီး အယောက် ၂၀ ကျော် ထိခိုက်ဒဏ်ရာရရှိခဲ့တယ်လို့ မူတြော်သတင်းစဉ်ရဲ့ထုတ်ပြန်ထားချက်အရ သိရပါတယ်။

ဇန်နဝါရီလ တစ်လတာအတွင်းမှာ အာဏာသိမ်းစစ်ကောင်စီက ဖာပွန်ခရိုင် တပ်မဟာ ၅ နယ်မြေက ကျေးရွာတွေအပေါ် လေယာဉ်နဲ့ ဗုံး ၁၄ လုံးလာရောက်ကြဲချခဲ့ပြီး လက်နက်ကြီးအချက်ပေါင်း ၂၀၀ နီးပါ ပစ်ခတ်ခဲ့တာကြောင့် အရပ်သားပြည်သူ ၅ ဦးသေဆုံးသွားခဲ့ပြီး ၁၈ ဦး ထိခိုက်ဒဏ်ရာရရှိသွားခဲ့တယ်လို့ ထုတ်ပြန်ချက်အရ သိရပါတယ်။

သေဆုံးသွားတဲ့သူတွေနဲ့ ထိခိုက်ဒဏ်ရာရရှိသွားတဲ့သူတွေမှာလည်း ကလေးငယ်တွေလည်ပါဝင်ခဲ့ပြီး ဒေသခံတွေရဲ့ နေအိမ်တွေ၊ ဆေးပေးခန်းတွေလည်း ထိခိုက်ပျက်စီးသွားခဲ့သေးတယ်လို့ သိရပါတယ်။

Public Service Announcement

ဒါ့အပြင် ဒီကနေ့မနက်ပိုင်းမှာလည်း တပ်မဟာ ၅ နယ်မြေ ဖာပွန်ခရိုင် မထောကျေးရွာအုပ်စု တဒွီးခိုကျေးရွာအပေါ် စစ်ကောင်စီက ဗုံးကြဲတိုက်ခိုက်မှုတွေလုပ်ဆောင်ခဲ့လို့ အရပ်သားပြည်သူ ၂ ဦးသေဆုံးသွားခဲ့ပြီး ကလေးတစ်ဦးအပါအဝင် ၆ ဦး ထိခိုက်ဒဏ်ရာရရှိသွားခဲ့တယ်လို့ ကရင်ငြိမ်းချမ်းရေးအထောက်အကူပြုကွန်ယက်(KPSN)က ပြောခွင့်ရသူ စောလေးကပေါ်က ဆိုပါတယ်။

“သေကြေပျက်စီးတာနှစ်ယောက်ပေါ့ ထိခိုက်ဒဏ်ရာရတာ ခြောက်ယောက်ပေါ့။ အဲ့ဒီထဲမှာတော့ ကလေးငယ်တစ်ယောက်ပါပါတယ်။ အသက် ၇ နှစ်အရွယ်ပေါ့။ သေသွားတာကတော့ သက်ကြီးပိုင်းပေါ့။ ရွာသားတွေကတော့ ရွာထဲမှာမနေရဲတော့ ခဏလောက်တော့ ရှောင်နေရတဲ့သဘောရှိတယ်။ သူတို့အခုလက်ရှိမှာ ကေအဲန်ယူကို သူတို့တိုက်တယ်။ ကေအဲန်ယူက သူတို့ကိုပြန်တိုက်တယ်။ အဲဒီအချိန်မှာ သူတို့ကအမြဲရှုံးနေတဲ့အခါမှာ သူတို့အနေနဲ့ မဲစရာဆိုလို့ ပြည်သူတွေပဲရှိတာပေါ့။ ခြိမ်းခြောက်တဲ့သဘောလို့ပဲမြင်တယ်။ သူတို့အနေနဲ့ ကရင်တော်လှန်ရေးတွေကို သူတို့မတိုက်နိုင်တော့ကြောင့်မို့လို့ ကရင်ပြည်သူတွေကို နှိပ်စက်နေတယ်လို့ ကျနော်တို့တော့ မြင်ပါတယ်” လို့ KPSN က ပြောခွင့်ရသူ စောလေးကပေါ်က ဆိုပါတယ်။

ဖာပွန်ခရိုင်ထဲမှာ အာဏာသိမ်းစစ်ကောင်စီက စစ်ရေးလှုပ်ရှားမှုတွေဆောင်ရွက်မှုတွေ ပိုမိုလုပ်ဆောင်နေပြီး လက်နက်ကြီးပစ်ခတ်တာ၊ လေကြောင်းတိုက်ခိုက်တာတွေ မကြာခဏ လုပ်ဆောင်နေတဲ့အတွက် ဒေသခံအရပ်သားပြည်သူတွေဟာ ထိတ်လန့်ကြောက်ရွံ့ပြီး ဖာပွန်ခရိုင်အတွင်း အရပ်သားပြည်သူ ၈၀၀၀၀ ကျော်ဟာ စစ်ဘေးရှောင်နေခဲ့ရတယ်လို့ KPSN ရဲ့ မှတ်တမ်းအရ သိရပါတယ်။

ဖာပွန်ခရိုင် တပ်မဟာ ၅ နယ်မြေထဲမှာ စစ်ကောင်စီတပ်က အင်အားတိုးချဲ့ပြီး စစ်ရေးလှုပ်ရှားမှုတွေလုပ်ဆောင်နေတာကြောင့် ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ နဲ့ ထိတွေ့တိုက်ပွဲတွေ နေ့စဉ်လိုလိုဖြစ်ပွားနေပြီး ဇန်နဝါရီလ တလတာအတွင်းမှာ တိုက်ပွဲပေါင်း ၃၀၀ ကျော်ဖြစ်ပွားခဲ့ပြီး စစ်ကောင်စီဘက်က ၂၀၀ နီးပါးသေဆုံးသွားခဲ့တယ်လို့ မူတြော်သတင်းစဉ်ရဲ့ ထုတ်ပြန်ထားချက်အရ သိရပါတယ်။