စစ်အာဏာရှင်စနစ်ကို ဆန့်ကျင်ပြီး ပြည်သူလူထုနှင့် တစ်သားတည်းရပ်တည်ကာ နိုင်ငံရေးနှင့် တော်လှန်ရေး ကဏ္ဍများတွင် ဦးဆောင်မှုပြုနေကြသည့် ကရင်တိုင်းရင်းသားခေါင်းဆောင်များနှင့် အဖွဲ့အစည်းများကို အစဉ်လေးစားကျေးဇူးတင်လျက်ရှိကြောင်း ယနေ့ကျရောက်သည့် ၇၄နှစ်မြောက် ကရင်အမျိုးသားနေ့သို့ အမျိုးသားညီညွတ်ရေးအစိုးရ(NUG)က သဝဏ်လွှာပေးပို့ ပြောကြားသည်။
ပြည်ထောင်စုစိတ်ဓာတ်ဖြင့် အတူတကွ ပူးပေါင်းလက်တွဲ၍ စစ်အာဏာရှင်စနစ်ကို ဆန့်ကျင်တွန်းလှန်တိုက်ပွဲဝင်လျက်ရှိကြသော ဖြောင့်မတ် တည်ကြည်သတ္တိကြီးသည့် ကရင်တစ်မျိုးသားလုံး၏ စွမ်းရည်ကိုလည်း အထူးအလေးထား အားကိုးကြောင်းလည်း ဖော်ပြထားသည်။
ဖက်ဒရယ်ဒီမိုကရေစီပြည်ထောင်စုကြီးတည်ထောင်ရန်အတွက် အရေးကြီးလှသည့် ယနေ့အချိန် ကာလတွင် အကြမ်းဖက်စစ်ကောင်စီ၏ အဓမ္မ အာဏာသိမ်းယူမှုကို နိုင်ငံတစ်ဝှမ်းလုံးရှိ တိုင်းရင်းသားပြည်သူ တစ်ရပ်လုံး ခုခံဆန့်ကျင် တွန်းလှန်လျက်ရှိရာ ကရင်တစ်မျိုးသားလုံးက ပြည်ထောင်စုစိတ်ဓာတ်ဖြင့် ဖေးမကူညီ ပံ့ပိုးခဲ့ကြသည်မှာ ကျေးဇူးတင် ဂုဏ်ယူဖွယ်ရာ ကောင်းလှကြောင်း သဝဏ်လွှာ၌ ပါရှိသည်။
ပြည်ထောင်စုကြီး ရင်ဆိုင်နေရသည့် လက်ရှိနိုင်ငံရေးအကျပ်အတည်းများကို အောင်မြင်စွာ ကျော်လွှားပြီး ဖက်ဒရယ်ဒီမိုကရေစီပြည်ထောင်စုကြီး ဖြစ်ထွန်းပေါ်ပေါက်လာရေး အရေးတော်ပုံခရီးလမ်းတွင် ကရင် တိုင်းရင်းသား သွေးချင်းများအပါအဝင် ပြည်ထောင်စုဖွား တိုင်းရင်းသားညီအစ်ကိုမောင်နှမများအားလုံး ဟန်ချက်ညီညီ စည်းစည်းလုံးလုံး လျှောက်လှမ်းကြပါစို့ဟုလည်း NUGက တိုက်တွန်းခဲ့သည်။
Public Service Announcement
တန်းတူညီမျှရေးနှင့် ဖက်ဒရယ်စနစ် ပီပီပြင်ပြင် ပေါ်ပေါက်လာရေးအတွက် တော်လှန်တိုက်ပွဲဝင်ရင်း အသက် အိုးအိမ်စည်းစိမ်များ ရင်းနှီးပေးဆပ်ခဲ့ကြရသည့် ကရင်အမျိုးသား ခေါင်းဆောင်ကြီးများ၊ ကရင့်အာဇာနည် သူရဲ ကောင်းရဲဘော်များ အားလုံးကို လေးစားအသိအမှတ်ပြုကြောင်း နှင့် စွန့်လွှတ်အနစ်နာခံ ပေးဆပ်ခဲ့ကြသည့် သွေးချင်းကရင်မိသားစုဝင်များအားလုံးကို ဦးညွှတ်ဂုဏ်ပြုကြောင်းလည်းသဝဏ်လွှာတွင် ဖော်ပြထားသည်။
