စစ်ရှောင်များကို ကူညီခြင်းအပါအဝင် ဇန်နဝါရီအတွင်း လူသားချင်းစာနာမှုဆိုင်ရာအကူအညီ ကျပ်သိန်း ၃,၆၀၀ ကျော်ပံ့ပိုးခဲ့ဟု NUGထုတ်ပြန်

အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာန အနေဖြင့် ပြည်သူ့ဝန်ဆောင်မှု လုပ်ငန်းများကို နည်းလမ်းမျိုးစုံဖြင့် ကြိုးပမ်းဆောင်ရွက်လျက်ရှိရာ ဇန်နဝါရီအတွင်း လူသားချင်းစာနာမှုဆိုင်ရာ အကူ အညီ ကျပ်သိန်း ၃,၆၀၀ ကျော်ပံ့ပိုးခဲ့ကြောင်း ယနေ့ထုတ်ပြန်သည်။

ထိုသို့ထောက်ပံ့ရာတွင် အာဏာသိမ်းအကြမ်းဖက် စစ်တပ်၏ ထိုးစစ်ဆင် တိုက်ခိုက်မှုများကြောင့်ထွက်ပြေးတိမ်းရှောင်နေရသူများအပြင် ဒေသအသီးသီးရှိ တော်လှန်ရေး၌ ပါဝင်ရင်း အသက်ဆုံးရှုံးရသူများ၏ မိသားစုဝင်များကိုလည်း အတတ်နိုင်ဆုံး ပံ့ပိုးကူညီပေးလျက်ရှိကြောင်း ဖော်ပြထားသည်။

စစ်ကောင်စီ၏ အကြမ်းဖက်မှုများကြောင့် ကရင်နီပြည်နယ်အတွင်း ဘေးလွတ်မည့်ဟုထင်သော နေရာများသို့ ထွက်ပြေးပုန်းရှောင်နေကြရသော ပြည်သူများ၊ ရှမ်းပြည်နယ် (တောင်ပိုင်း)ရှိ မြို့နယ်များနှင့် ကရင်ပြည် နယ် ဆက်စပ်မြို့နယ်များသို့ လာရောက် ခိုလှုံလျက်ရှိကြသည့် ပြည်သူများ၊ တနင်္သာရီတိုင်း၊မွန်ပြည်နယ်၊ကရင်ပြည်နယ်၊မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ ကချင်ပြည်နယ် များရှိတိုက်ပွဲရှောင်ပြည်သူများအတွက် ဒေသခံမိတ်ဖက်အဖွဲ့များ၊ လူငယ်အဖွဲ့များနှင့် ချိတ်ဆက်၍ စားနပ်ရိက္ခာလိုအပ်ချက်များ၊ အသုံးအဆောင်ပစ္စည်းများ ပံ့ပိုးကူညီပေးခဲ့သည်ဟုထုတ်ပြန်သည်။

ထောက်ပံ့မှုများကို စစ်တပ်၏ အတားအဆီးအမျိုးမျိုးကြားမှ ဘေးဒုက္ခခံစားနေကြရသော ပြည်သူများလက်ဝယ်အရောက် စီစဉ်ဆောင်ရွက်ပေးကြသည့် ဒေသခံ မိတ်ဖက်အဖွဲ့များ၊ ကိုယ်စားလှယ်များ၊ စေတနာ့ဝန်ထမ်းပြည်သူများကို ကျေးဇူးတင်ရှိကြောင်းလည်း ဖော်ပြထားသည်။

Public Service Announcement