မိုးဗြဲတွင် အရပ်သား ငါးဦးထက်မနည်းကို စစ်ကောင်စီတပ် ယနေ့ ပစ်သတ်ဟု PDF ​ပြော

ရှမ်းပြည်နယ်တောင်ပိုင်း မိုးဗြဲဒေသတွင် စစ်ကောင်စီတပ်မှ အင်အား ၅၀ခန့်ဖြင့် ထိုးစစ်ဆင်လျက်ရှိရာ လမ်းတစ်လျှောက် အရပ်သားများကို ပစ်ခတ်သတ်ဖြတ်မှုများ လုပ်ဆောင်နေကြောင်း မိုးဗြဲ ပြည်သူ့ကာကွယ်ရေးတပ်(PDF)က ထုတ်ပြန်သည်။

ယနေ့ (ဖေဖော်ဝါရီ ၂၇ရက်)နံနက်ပိုင်းမှစ၍ မိုးဗြဲမြို့နယ် လွယ်ယင်းမင်္ဂလာဘက်သို့ ထိုးစစ်ဆင်လျက်ရှိရာ လက်ရှိ အချိန်ထိ အရပ်သား ငါးဦးထက်မနည်းကို အကြမ်းဖက် စစ်ကောင်စီတပ်မှ ပစ်သတ်ခဲ့ကြောင်း မိုးဗြဲ PDFက ယနေ့ မွန်းလွဲ ၃နာရီခန့်တွင် ထုတ်ပြန်သည်။

စစ်ကောင်စီတပ်၏ လက်နက်ကြီး အလွန်အကျွံပစ်ခတ်ထိုးစစ်ဆင်မှုများကြောင့် မိုးဗြဲနယ်ရှိ အရပ်သားပြည်သူများမှာ ဘေးလွတ်ရာသို့ ထွက်ပြေးတိမ်းရှောင်နေရကြောင်း၊ ယနေ့တွင် ရိက္ခာ လာယူသော အရပ်သားများကို အကြမ်းဖက် စစ်တပ်မှ ပစ်သတ်ခဲ့ခြင်းဖြစ်ကြောင်း ဖော်ပြထားသည်။ စစ်ကောင်စီတပ်အနေဖြင့် ယခင်ကလည်း ရိက္ခာပြန်ယူသည့် ဒီးမော့ဆို စစ်ရှောင်များကို ပစ်ခတ်သတ်ဖြတ် ခဲ့ခြင်းများ ရှိခဲ့ဖူးသည်။

မိုးဗြဲနယ်ရှိ ပြည်သူများအနေဖြင့် စစ်ဇုန်နယ်မြေများတွင် ဖြတ်သန်းသွားလာခြင်းကို ရှောင်ကျဉ်ပေးရန်နှင့် စစ်ရေးတင်းမာသည့် ကာလများတွင် ခရီးသွားလာခြင်း အထူးသတိထားရန်လည်း မိုးဗြဲ PDFက တိုက်တွန်းထားသည်။

Public Service Announcement

ကရင်နီအမျိုးသားကာကွယ်ရေးတပ်(KNDF) ပြောရေး ဆိုခွင့်ရှိသူတစ်ဦးကလည်း စစ်ကောင်စီတပ်က လေကြောင်းတိုက်ခိုက်မှု၊ လက်နက်ကြီးပစ်ခတ်မှုကို နေ့ရောညပါ လုပ်ဆောင်နေကြောင်း၊ ပြည်သူများကို လူသားတစ်ယောက်အနေဖြင့် စာနာထောက်ထားမှု မထားရှိတော့ဘဲ တိုက်ခိုက်နေခြင်းဖြစ်ကြောင်း ပြောကြားသည်။

“တိုက်ပွဲတွေ တောက်လျှောက်ရှိတယ်။ မနက်ရော နေ့လည်ရော ညရော တိုက်ပွဲ ဘယ်နှစ်ကြိမ်ဖြစ် တယ်ဆိုတဲ့ဟာကို လိုက်တွဲလို့မရတော့ဘူး။ ခဏနေ လေယာဉ်နဲ့ပစ်လိုက် ခဏနေ လက်နက်ကြီးနဲ့ပစ်လိုက်။ အဲဒီလိုမျိုးတွေ တောက်လျှောက်ဖြစ်နေတယ်”ဟု KNDF ပြောရေး ဆိုခွင့်ရှိသူက ပြောသည်။