ရန်ကုန်တွင် ယမန်​နေ့က တစ်ရက်တည်း မီး​ရှစ်ကြိမ်လောင်

▪️ယ​နေ့နံနက်တွင်လည်း နှစ်ကြိမ်မီး​လောင်မှုဖြစ်

ရန်ကုန်တိုင်းဒေသကြီးအတွင်း၌ ယ​မန်​နေ့(ဖေဖော်ဝါရီ ၂၈ရက်)က မီး​လောင်မှုရှစ်ကြိမ်ဖြစ်ခဲ့ကြောင်း မြန်မာ နိုင်ငံမီးသတ်တပ်ဖွဲ့က ထုတ်ပြန်ထားသည်။

မီး​လောင်မှုဖြစ်ပွား​သော မြို့နယ်များမှာ မင်္ဂလာဒုံ နှင့် ရွှေပြည်သာ မြို့နယ်များ၌ ကိုင်းတောမီးလောင်မှုသုံးကြိမ် ၊ တာမွေ ၊အင်းစိန်နှင့် တိုက်ကြီးမြို့နယ်တို့၌ နေအိမ်မီးလောင်မှုသုံးကြိမ်နှင့် လှိုင်သာယာ၊ဒဂုံမြို့သစ်ဆိပ်ကမ်းမြို့နယ်တို့၌ စက်ရုံမီးလောင်မှု နှစ်ကြိမ်ဖြစ်ခဲ့သည်။

ကိုင်းတောမီးလောင်မှုများအနက် နှစ်ခုကို မိနစ်ပိုင်းအတွင်းငြှိမ်းသတ်နိုင်ခဲ့ပြီး မင်္ဂလာဒုံမြို့နယ်၌ဖြစ်သည့် မီးလောင်မှုကို ၁နာရီခန့် မီးငြှိမ်းသတ်ခဲ့ရကြောင်း မီးသတ်တပ်ဖွဲ့က ထုတ်ပြန်ထားသည်။

Public Service Announcement

နေအိမ်မီးလောင်မှုများကို နာရီဝက်ခန့်အတွင်းမီးငြှိမ်းသတ်နိုင်ခဲ့ပြီး တာမွေ၌ဖြစ်သည့် မီးလောင်မှုကို Level-2 အဆင့်မီးငြှိမ်းသတ်ယာဉ်များစေလွှတ်ခဲ့ရသည်။

စက်ရုံမီးလောင်မှုနှစ်ခုအနက် လှိုင်သာယာမြို့နယ် စက်မှုဇုန်အပိုင်း (၄)၌ ဖြစ်သည့် မီးလောင်မှုကို Level-3 အဆင့်မီးငြှိမ်းသတ်ယာဉ်များ စေလွှတ်မီးငြှိမ်းခဲ့ရပြီး ၁နာရီခန့် မီးငြှိမ်းသတ်ခဲ့ရကြောင်း ထုတ်ပြန်ထားသည်။

ဒဂုံမြို့သစ်ဆိပ်ကမ်းမြို့နယ် စက်မှုဇုန် (၂)ရှိ လက်အိတ်စက်ရုံ မီးလောင်မှုကို Level -2 အဆင့်မီးငြှိမ်းသတ်ယာဉ်များစေလွှတ်မီးငြှိမ်းသတ်ခဲ့ရပြီး ၄နာရီကျော်ကြာ မီးငြှိမ်းသတ်ခဲ့ရကြောင်း မီးသတ်တပ်ဖွဲ့က ထပ်မံထုတ်ပြန်ထားသည်။

အထက်ပါမီးလောင်မှုများ၏ မီးလောင်မှုအကြောင်း ရင်းနှင့် ဆုံးရှုံးမှုတန်ဖိုးကို မီးသတ်တပ်ဖွဲ့အနေဖြင့်ထုတ်ပြန်ထားခြင်းမရှိပေ။

ထို့အပြင် ရန်ကုန်မြို့၌ ယနေ့(မတ်လ၁ရက်)နံနက် ၆နာရီခန့်တွင် ရွှေပြည်သာမြို့နယ်မှ ​နေအိမ်တစ်လုံးနှင့် လှိုင်သာယာမြို့နယ်ရှိ စက်ရုံတစ်ရုံ မီးလောင်မှုဖြစ်ခဲ့ကြောင်း မီးသတ်တပ်ဖွဲ့က ထုတ်ပြန်ထားသည်။

ရွှေပြည်သာမြို့နယ်မှ နေအိမ်မီးလောင်မှုကို မိနစ်၃၀ ခန့်ကြာ မီးငြှိမ်းသတ်ခဲ့ရပြီး လှိုင်သာယာရှိ စက်ရုံမီးလောင်မှုကို Level -2အဆင့် မီးငြှိမ်းသတ်ယာဉ်များက ၁နာရီခန့် မီးငြှိမ်းသတ်ခဲ့ရသည်ဟု ထုတ်ပြန်ထားသည်။

နွေရာသီသို့ရောက်ရှိလာသည်နှင့်အမျှ မီးလောင်မှုဖြစ်စဉ်များ ယခင်ထက်များပြားလာသလို အချို့မီးလောင်မှုများသည် လျှပ်စစ်ဓာတ်အားမတည်ငြိမ်ခြင်းကြောင့် ဖြစ်နိုင်ကြောင်း ပြည်သူအချို့ကသုံးသပ်သည်။