စစ်ရာဇဝတ်မှုနဲ့လူသားမျိုးနွယ်အပေါ် ရာဇဝတ်မှုတွေ စစ်ကောင်စီကျုးလွန်နေတာထင်ရှားတယ်လို့ ကုလဆို

စစ်တပ်အာဏာသိမ်းကတည်းက မြန်မာနိုင်ငံမှာ အစုလိုက်အပြုံလိုက်သတ်ဖြတ်ခံရမှုတွေရှိနေပြီး စစ်ကောင်စီဟာ စစ်ရာဇဝတ်မှုနဲ့ လူသားမျိုးနွယ်အပေါ် ကျုးလွန်တဲ့ရာဇဝတ်မှုတွေဖြစ်တယ်လို့ ကုလသမဂ္ဂရဲ့ လူ့အခွင့်အရေးရုံးက မနေ့ကမတ်လ ၁၅ ရက်မှာ ထုတ်ပြန်ကြေညာလာပါတယ်။

ဒါကြောင့် နိုင်ငံတကာအသိုင်းအဝိုင်းအနေနဲ့ မြန်မာနိုင်ငံမှာ ဖြစ်ပျက်နေတဲ့ အကြမ်းဖက်မှုတွေကိုရပ်တန့်ဖို့ ချက်ချင်းအရေးယူမှုတွေလုပ်ကြဖို့ကို ကုလလူ့အခွင့်အရေးရုံးက တိုက်တွန်းပါတယ်။

အာဏာသိမ်းမှုနောက်ပိုင်းကာလတွေကို စောင့်ကြည့်ထားတဲ့အစီရင်ခံစာအရဆို မြန်မာစစ်တပ်နဲ့လုံခြုံရေးတပ်ဖွဲ့ဝင်တွေဟာလူ့အသက်တွေကို အလေးထားတန်ဖိုးထားရမှန်းမသိတဲ့ လုပ်ရပ်တွေ ကျုးလွန်ခဲ့တယ်လို့ ကုလလူ့အခွင့်အရေးကောင်စီရဲ့ အကြီးအကဲက ပြောပါတယ်။

လူနေလူထပ်တဲ့နေရာကို ဗုံးကြဲပစ်တာ ၊ လေကြောင်းတိုက်ခိုက်မှုနဲ့ လက်နက်ကြီးတွေ ပစ်ခတ်တာ ၊အရပ်သားပြည်သူတွေကို ရည်ရွယ်ချက်ရှိရှိ ပစ်မှတ်ထားတိုက်ခိုက်တာ ၊ အရပ်သားတွေကိုသေနတ်နဲ့ ဦးခေါင်းတေ့ပစ်သတ်တာ ၊တရားလက်လွတ် ဖမ်းချင်သလိုဖမ်းဆီးနေတာ ၊ နှိပ်စက်ညှင်းပန်းတာ ၊ လူသားဒိုင်းလုပ်တာတွေကို စစ်ကောင်စီက ကျုးလွန်နေတာလို့ ဆိုပါတယ်။

Public Service Announcement

ဒီလုပ်ရပ်ဟာတွေအရ စစ်ကောင်စီဟာ စစ်ရာဇာဝတ်မှုတွေနဲ့ လူသားမျိုးနွယ်အပေါ် ရာဇဝတ်မှုတွေကျုးလွန်နေတာ ထင်ရှားနေကြောင်း ကုလလူ့အခွင့်အရေးရုံးရဲ့ပြောရေးဆိုခွင့်ရှိသူအမျိုးသမီးကပြောပါတယ်။

မြန်မာနိုင်ငံမှာ စစ်တပ်က အာဏာသိမ်းမှုနောက်ပိုင်း စစ်တပ်ရဲ့ ကျုးလွန်မှုတွေအပေါ် အရေးယူတာတွေ လုပ်ကိုင်ပေးဖို့ ပြည်သူတွေက ကုလကိုတောင်းဆိုခဲ့ကြပါတယ်။

ဒါပေမယ့် ကုလရဲ့ ဆောင်ရွက်ပေးချက်တွေအပေါ်တော့ မြန်မာပြည်သူတွေဟာ အားမလိုအားမရ ဖြစ်နေကြပါတယ်။