ကချင်ပြည်နယ် ဖားကန့်မြို့ပေါ်ရှိ မြို့နယ်လျှပ်စစ်မန်နေဂျားရုံးအတွင်း ယနေ့ည ၇နာရီခန့်က ပြင်းထန်သော ပေါက်ကွဲမှုဖြစ်ပွားခဲ့သည်။
ဖားကန့်မြို့နယ် လျှပ်စစ်ရုံးသည် ယနေ့(ဧပြီ ၁ရက်) ည ၇နာရီခန့်တွင် ပေါက်ကွဲမှုဖြစ်ခဲ့ခြင်းဖြစ်သည်။
“ရုံးဝမှာ ပေါက်တာ။ ပေါက်ကွဲအား ပြင်းတယ်။ ကားတစ်စီးထိတယ်။ လူထိမထိတော့ မသိရသေးဘူး”ဟု ဖားကန့်ဒေသခံတစ်ဦးက ပြောသည်။
ပေါက်ကွဲမှုဖြစ်ပြီးနောက် အကြမ်းဖက်စစ်ကောင်စီက လမ်းသွားလမ်းလာအချို့ကို တားဆီးစစ်ဆေးနေသည်ဟု ဒေသခံများက ပြောသည်။
Public Service Announcement
ဖားကန့်မြို့သည် စစ်အာဏာရှင်ဆန့်ကျင်ရေးတွင် အလွန်တက်ကြွလှုပ်ရှားသည့်မြို့ဖြစ်ပြီး KIAနှင့် PDFအားထောက်ခံသည့်သပ်ိတ်နှင့် မင်းအောင်လှိုင်ခေါင်းဆောင်သည့် စစ်အာဏာသိမ်းမှုအား ဆန့်ကျင်ရှုတ်ချရေးသပိတ်ကို နေ့စဥ်ပြုလုပ်နေသည်။
၂၀၂ဝ ပြည်လုံးကျွတ်ရွေးကောက်ပွဲ အောင်နိုင်ခဲ့သည့် အမတ်များအနက် အသက်အငယ်ဆုံးဖြစ်သည့် ဖားကန့်မြို့နယ်ပြည်သူ့လွှတ်တော်ကိုယ်စားလှယ်
ဦးအောင်ဟိန်းမင်းက ယမန်နေ့(မတ်၃၁ရက်)တွင် ဖေ့ဘွတ်စ် လူမှုကွန်ရက်မှတစ်ဆင့် လူထုအား စကားပြောကြားရာ၌ စစ်အာဏာရှင်ဇာတ်သိမ်းသည်အထိ ပြည်သူ့အားဖြင့် တိုက်ထုတ်သွားမည်ဟု ပြောကြားထားသည်။
အမျိုးသားဒီမိုကရေစီအဖွဲ့ချုပ်ပါတီကိုယ်စားပြုရွေးကောက်ခံခဲ့သည့် အသက်(၂၇)နှစ်အရွယ် ဦးအောင်ဟိန်းမင်းသည် ယခုအခါ လုံခြုံစိတ်ချရသည့် နေရာ၌ နေထိုင်ရင်း စစ်အာဏာရှင်ဆန့်ကျင်ရေးကို ဆောင်ရွက်နေသည်။
