အမျိုးသားညီညွတ်ရေးအစိုးရ(NUG) လူ့အခွင့်အရေးဆိုင်ရာဝန်ကြီး ဦးအောင်မျိုးမင်းဦးဆောင်သည့် ကိုယ်စားလှယ်အဖွဲ့သည် အမေရိကန်အစိုးရ ထိပ်တန်းတာဝန်ရှိသူများနှင့် ယနေ့(ဧပြီ ၅ ရက်) တွေ့ဆုံမည်ဖြစ်သည်။
အမေရိကန်သို့ ရောက်ရှိနေသည့် NUG ကိုယ်စားလှယ်အဖွဲ့တွင် ဝန်ကြီးဦးအောင်မျိုးမင်း၊ နိုင်ငံခြားရေးဒုတိယဝန်ကြီး ဦးမိုးဇော်ဦး၊ အာဆီယံဆိုင်ရာ သံအမတ်ကြီး ဦးဘိုလှတင့်တို့ပါဝင်ပြီး ယင်းခရီးစဉ်အတွင်း အာဏာသိမ်းမှုအပြီး မြန်မာနိုင်ငံလူ့အခွင့်အရေးအကျပ်အတည်း၊ လူသားချင်းစာနာထောက် ထားမှုအကူအညီများနှင့်ပတ်သက်၍ ဆွေးနွေးမည်ဟု သိရသည်။
ခရီးစဉ် ပထမနေ့(ဧပြီ ၄ ရက်)တွင် NUG ကိုယ်စားလှယ်အဖွဲ့သည် မြို့တော်ဝါရှင်တန်ရှိ Holocaust Memorial Museum သို့သွားရောက်ကာ ရိုဟင်ဂျာများအပေါ် လူမျိုးသုဉ်းသတ်ဖြတ်မှုဆိုင်ရာ မှတ်တမ်းများကို လေ့လာခဲ့သည်။
အဆိုပါခရီးစဉ်အတွင်း အမေရိကန်နိုင်ငံခြားရေးဝန်ကြီးဌာန ထိပ်တန်းတာဝန်ရှိသူများ၊ လုံခြုံရေးဆိုင်ရာ အကြံပေးပုဂ္ဂိုလ်များ၊ ဥပဒေပြုလွှတ်တော်အမတ်များနှင့်တွေ့ဆုံရန်စီစဉ်ထားကြောင်း ဝန်ကြီးဦးအောင်မျိုးမင်းက ပြောသည်။
Public Service Announcement
လူ့အခွင့်အရေးဝန်ကြီးဦးအောင်မျိုးမင်း ဦးဆောင်သော ကိုယ်စားလှယ်အဖွဲ့၏ အလုပ်တာဝန်များ အောင်မြင်စွာ ဆောင်ရွက်နိုင်ရေး NUG ပြည်ထောင်စုဝန်ကြီးချုပ် မန်းဝင်းခိုင်သန်းက ဆုမွန်ကောင်း တောင်းထားသည်။
