စစ်ကိုင်းတိုင်း၊ ပုလဲမြို့နယ်အတွင်း အကြမ်းဖက်စစ်ကောင်စီစစ်ကြောင်းနှင့် နှစ်ကြိမ်ထိတွေ့တိုက်ပွဲဖြစ်ရာ စစ်ကောင်စီတပ်သား ခုနစ်ဦးခန့်သေဆုံးကြောင်း မြန်မာ့တော်ဝင်နဂါးတပ်တော် (M.R.D.A)က ယနေ့(ဧပြီ ၂၀ ရက်)တွင် ထုတ်ပြန်သည်။
တိုက်ပွဲ ဖြစ်စဥ်များမှာ ဧပြီ ၁၉ ရက် နံနက်၆ နာရီခွဲခန့်တွင် ပုလဲမြို့နယ်၊ ကံကြီးကျေးရွာ နှင့် ကြူခြံကျေးရွာအကြားတွင် အကြမ်းဖက်စစ်ကောင်စီစစ်ကြောင်းနှင့် မြန်မာ့တော်ဝင်နဂါးတပ်တော်(M.R.D.A)တပ်ခွဲတို့ ထိတွေ့မှုတိုက်ပွဲ၌ စစ်ကောင်စီတပ်သားငါးဦး သေဆုံးသည်ဟု ဆိုသည်။
အဆိုပါ စစ်ကောင်စီစစ်ကြောင်းနှင့်ပင် ပုလဲမြို့နယ်၊ ကြူခြံကျေးရွာအနောက်ဘက်ရှိ ချင်ပြစ်ကျေးရွာအရှေ့တောင်ဘက်တွင် နေ့လည် ၁ နာရီကစ၍ ညနေ ၄ နာရီခွဲခန့်ထိ ထပ်မံတိုက်ပွဲ ဖြစ်ပွားရာ စစ်ကောင်စီတပ်သား နှစ်ဦးသေဆုံးသည်ဟု အသိပေးသည်။
ထိတွေ့မှုနှစ်ကြိမ်တွင် မြန်မာ့တော်ဝင်နဂါးတပ်တော် (M.R.D.A)တပ်ခွဲမှ နဂါးစစ်သည်တော်တစ်ဦး ထိခိုက်ဒဏ်ရာရခဲ့ကြောင်း ထုတ်ပြန်ချက်၌ ဖော်ပြသည်။
Public Service Announcement
ဧပြီ ၁၈ ရက်ကစ၍ ပုလဲမြို့နယ်အတွင်း အင်အား ၁၀၀ ကျော်ဖြင့် စစ်ကောင်စီက စစ်ကြောင်းထိုးနေကြောင်း MRDA ဦးဆောင်သူ ဗိုလ်နဂါးက People’s Springသို့ ပြောသည်။
ထို့နေ့မှစ၍ MRDA က ကြားဖြတ်တိုက်ခိုက်မှု သုံးကြိမ်ပြုလုပ်ခဲ့ရာ စစ်ကောင်စီတပ်သား ၃၃ ဦး ထက်မနည်းသေဆုံးခဲ့သည်ဟု ထုတ်ပြန်ထားသည်။
