စစ်ကိုင်းတိုင်း ဆားလင်းကြီးမြို့နယ်တွင် ယနေ့ (မေလ ၁) ညပိုင်း၌တိုက်ပွဲမှပြန်လာသည့်ပြည်သူ့ကာကွယ်ရေးတပ်ဖွဲ့ (PDF) များကိုဒေသခံပြည်သူများက သပြေပန်းများဖြင့် ဝမ်းပန်းတသာ ကြိုဆိုခဲ့ကြသည်။
ယနေ့နံနက်ပိုင်းက ဆားလင်းကြီးမြို့နယ်ရှိ ကျေးရွာများကို စစ်ကောင်စီက စစ်ကြောင်းထိုးလာပြီး ရွာများကို မီးရှို့ရန် လုပ်ဆောင်နေစဥ် ဒေသခံ ပြည်သူ့ကာကွယ်ရေးတပ်ဖွဲ့ဖြင့် တိုက်ပွဲဖြစ်ပွားခဲ့ခြင်း ဖြစ်ကြောင်း သိရသည်။
” ဆားလင်းကြီး ခွန်သာဘက်က ရွာတွေကို စစ်ကောင်စီတွေ ဝင်လာပြီး မီးရှို့ဖို့ လုပ်နေတယ်လို့ သတင်းကြားလို့ သွားကူညီတာပါ။ ရှေ့ပြေးစစ်ကြောင်းလို့တော့သိရတယ်။ ပျူစောထီးတွေရော အင်အား ၂၀ လောက်ပါတယ်။ ကျွန်တော်တို့ ရောက်သွားပြီး ဝိုင်းပစ်တော့မှ သူတို့ဘက် အင်အားမမျှမှန်းသိလို့ ပြန်ဆုတ်သွားပါတယ် ” ဟု PDF တစ်ဦးကပြောသည်။
ပြည်သူ့ကာကွယ်ရေး တပ်သားများကို လူထုက ကြိုဆိုသည့်အတွက် ဝမ်းသာမိကြောင်းနှင့် ပြည်သူများ၏ အသက်အိုးအိမ်စည်းစိမ်များကို အသက်နှင့်လဲ၍ ကာကွယ်သွားမည် ဖြစ်ကြောင်း ဒေသခံ PDF တစ်ဦးက လူမှုကွန်ယက်၌ ရေးသားခဲ့သည်။
Public Service Announcement
အာဏာသိမ်းစစ်ကောင်စီတပ်သည် စစ်ကိုင်းနှင့် မကွေးတိုင်းရှိ ကျေးရွာများမှ ပြည်သူလူထုနေအိမ်များ အပါအဝင် နေရာပေါင်း ၄၀ကျော်၌ မီးရှို့ဖျက်ဆီးမှုများပိုမိုပြုလုပ်လာပြီးဧပြီလနောက်ဆုံး နှစ်ပတ်အတွင်း အိမ်ခြေ ၂၂၃၀ လုံးထက်မနည်း မီးလောင်ပျက်စီးခဲ့ရကြောင်း Data for Myanmar က သတင်းထုတ်ပြန်ထားသည်။ အာဏာသိမ်းပြီးနောက်ပိုင်း အကြမ်းဖက်စစ်တပ်က မီးရှို့ မီးရှို့ဖျက်ဆီးခဲ့သောနေအိမ်ပေါင်း နိုင်ငံတစ်ဝန်း အိမ်ခြေ
၁၁,၀၀၀ ကျော်ရှိနေပြီဖြစ်သည်။
