စစ်ကောင်စီတပ် ပေါ်တာဆွဲလာသည့် အရပ်သားနှစ်ဦးလည်း တိုက်ပွဲတွင်သေဆုံးဟုဆို
မူဆယ်မြို့နယ် မော့တောင်းရွာအနီး ယနေ့ညနေ ၅နာရီခန့်ကဖြစ်ပွားသည့်တိုက်ပွဲတွင် TNLA ၏တိုက်ခိုက်မှုကြောင့် စစ်ကောင်စီတပ်ဖွဲ့ဝင် ၁၂ဦး သေဆုံးသွားခဲ့သည်။
မန္တလေး-မူဆယ်ပြည်ထောင်စုလမ်းပိုင်း နမ့်ဖက်ကာနှင့်မူဆယ်ကြားမှ မော့တောင်းကျေးရွာအနီးတွင် အကြမ်းဖက်စစ်ကောင်စီနှင့် တအာင်းအမျိုးသားလွတ်မြောက်ရေးတပ်မတော် (TNLA)တိုက်ပွဲ ဖြစ်ခဲ့ပြီး စစ်ကောင်စီအလောင်းများ ပုံထပ်နေသည်ဟု ဒေသခံများကပြောသည်။
“စစ်တပ်က အရပ်သားနှစ်ယောက်စီးလာတဲ့ အမိုးဖွင့်ကားကို ပေါ်တာဆွဲပြီး တက်လိုက်လာတာ။ မော့တောင်းနားမှ TNLA နဲ့ တွေ့ပြီး တိုက်ပွဲဖြစ်တာ။ RPG စာမိတာလို့ကြားတယ်။ စစ်ခွေးအလောင်းတွေ ပုံထပ်နေတာပဲ “ဟု ဒေသခံတစ်ဦးက ပြောသည်။
Public Service Announcement
စစ်ကောင်စီပေါ်တာဆွဲလာသည့် ကားပေါ်ပါ အရပ်သားနှစ်ဦးသည်တိုက်ပွဲအတွင်း သေဆုံးသွားခဲ့ပြီး စစ်ကောင်စီတပ်ဖွဲ့ဝင် ၁၂ဦးလည်း သေဆုံးသည်ဟု မျက်မြင်တွေ့သူတစ်ဦးက ပြောသည်။
“အရပ်သားနှစ်ဦးအလောင်းကို လူမှုရေးအဖွဲ့တွေ လာသယ်သွားတယ်။ စစ်ခွေးတွေရဲ့ အလောင်းတွေကိုတော့ အသယ်မခံဘူး။ သူတို့ဘာသာ သယ်မယ့်ပုံပဲ”ဟု ဒေသခံတစ်ဦးကပြောသည်။
အထိနာသည့် စစ်ကောင်စီက စစ်ကြောင်းထိုးလာဖွယ်ရှိ၍ ဒေသခံများက စိုးရိမ်နေကြသည်။
