စစ်ကိုင်းတိုင်း၊ ယင်းမာပင်မြို့နယ်တွင် အကြမ်းဖက်စစ်ကောင်စီတပ်အား ဒေသကာကွယ်ရေးတပ်ဖွဲ့များက ခုခံတိုက်ခိုက်ရာ နှစ်ဖက်ထိခိုက်မှုများရှိကြောင်း အမိမြေတော်လှန်ရေးတပ်ဖွဲ့က သတင်းထုတ်ပြန်သည်။
ယမန်နေ့(မေလ ၁၂ ရက်) နေ့လယ်ပိုင်းက ယင်းမာပင်မြို့နယ်၊ သီးကုန်းကျေးရွာအနီးတွင် အင်အား ၁၀၀ခန့်ရှိသော စစ်ကောင်စီစစ်ကြောင်းအား အမိမြေတော်လှန်ရေးတပ်ဖွဲ့နှင့် အခြားဒေသတွင်းအဖွဲ့များပူးပေါင်းပြီး တိုက်ခိုက်ခဲ့ခြင်းဖြစ်သည်။
လက်နက်ကြီး၊ လက်နက်ငယ်များဖြင့် အချိန်အတော်ကြာ အပြန်အလှန်ပစ်ခတ်ခဲ့ကြသည်ဟု အမိမြေတော်လှန်ရေးတပ်ဖွဲ့က ပြောသည်။
ယနေ့(မေလ ၁၃ ရက်)နံနက် ၇နာရီခန့်က ကျောက်ပြုတ်ကျေးရွာအနီးတွင် အဆိုပါ စစ်ကြောင်းနှင့်အပြန်အလှန်ပစ်ခတ်မှုဖြစ်ပွားရာ တစ်နာရီနီးပါးကြာမြင့်ခဲ့ကြောင်း၊ တိုက်ပွဲနှစ်ခုတွင် အကြမ်းဖက်စစ်ကောင်စီဘက်မှ ထိခိုက်သေဆုံးမှုများရှိနိုင်ပြီး ပူးပေါင်းတပ်ဖွဲ့မှ ရဲဘော်ခြောက်ဦး ထိခိုက်ဒဏ်ရာရရှိထားသည်ဟု အမိမြေတော်လှန်ရေးတပ်ဖွဲ့က ပြောသည်။
Public Service Announcement
ထုတ်ပြန်ချက်နှင့်ပတ်သက်၍ အမိမြေတော်လှန်ရေးတပ်ဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။
စစ်ကောင်စီတပ်သည် မေလ ၁၂ ရက်က ယင်းမာပင်မြို့နယ်၊ နဘူးတောကျေးရွာကို ဝင်ရောက်ကာ နေအိမ် ခြောက်လုံးကို မီးရှို့ဖျက်ဆီးခဲ့ပြီး အမျိုးသမီးတစ်ဦးကိုလည်း သတ်ဖြတ်သွားခဲ့သည်။
အမိမြေတော်လှန်ရေးတပ်ဖွဲ့သည် မေလ ၁၁ရက်ကလည်း မုံရွာ-ညောင်ပင်ကြီးမှတစ်ဆင့် ယင်းမာပင်ဘက်သို့ တက်လာသော စစ်ကားများကို Young People Force အဖွဲ့နှင့်ပူးပေါင်းပြီး မိုင်းခွဲတိုက်ခိုက်ခဲ့သည်။
