အကြမ်းဖက်စစ်ခေါင်းဆောင်းမင်းအောင်လှိုင်၏ ရန်ကုန်မြို့ အင်းယားလမ်းမှအိမ်ကိုရှယ်ယာစနစ်ဖြင့် ရောင်းချရာတွင် ဒေါ်လာ ၆သန်းဖိုးရောင်းချပြီးဖြစ်သည်ဟု အမျိုးသားညီညွတ်ရေးအစိုးရ(NUG) ၊စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီးဌာနမှ သိရသည်။
လက်ရှိအချိန်အထိ ဝယ်ယူသူ ဦးရေ ၉၀၀၀ကျော်ရှိပြီး ဒေါ်လာ တစ်သောင်းဖိုးအထက်ဝယ်ယူသူ အယောက် ၂၀၀ကျော်ရှိပြီး ၊ တစ်ဦးတည်း အစောင် ၂၀၀၀ (ဒေါ်လာ နှစ်သိန်းဖိုး) ဝယ်ယူသူများလည်းရှိသည်ဟု NUG သတင်းရင်းမြစ်အချို့ကပြောသည်။
ထိုရောင်းရငွေများကို တော်လှန်ရေးအတွက် အရေးကြီးနေရာများတွင် တိုက်ရိုက်အသုံးပြုနေခြင်းဖြစ်ကြောင်း စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီး၊ ဦးတင်ထွန်းနိုင်ကပြောထားသည်။
စစ်ခေါင်းဆောင် မင်းအောင်လှိုင်ပိုင်ဆိုင်ထားသည့် အင်းယားလမ်း၊ အိမ်နံပတ်(၁၄)ကို အမေရိကန်ဒေါ်လာ ၁၀သန်းသတ်မှတ်ပြီး ရှယ်ယာစနစ်ဖြင့် မေလ ၅ ရက်မှစတင်ရောင်းချနေခြင်းဖြစ်သည်။
Public Service Announcement
နှစ်ဧကခန့် ကျယ်ဝန်းသော အင်းလျားလမ်းရှိ အာဏာသိမ်းခေါင်းဆောင်ပိုင်ဆိုင်သည့် ခြံအမှတ် ၁၄ နေအိမ်ကို အမျိုးသား ညီညွတ်ရေး အစိုးရ၏ စီမံကိန်း ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီးဌာန၏ ရာဖြတ်အဖွဲ့က ကာလတန်ဖိုး အမေရိကန်ဒေါ်လာ ၃၆ သန်းဟု သတ်မှတ်ခဲ့သည်။ ထိုကာလတန်ဖိုး၏ သုံးဆယ်ရာခိုင်နှုန်းဖြစ်သည့် ဒေါ်လာ ၁၀ သန်းကို တစ်စုလျှင် ဒေါ်လာ၁၀၀ တန်ဖိုးရှိအစုရှယ်ယာတစ်သိန်းသတ်မှတ်ပြီး ရောင်းချနေခြင်းဖြစ်သည်။
ရန်ကုန်မြို့တွင် စစ်ခေါင်းဆောင် မင်းအောင်လှိုင်အမည်ဖြင့် သိမ်းယူပိုင်ဆိုင်ထားသည့် နေအိမ်လေးလုံးရှိပြီး ၎င်းတို့ကို ဆက်လက် လေလံတင်ရောင်းချသွားမည်ဟု အမျိုးသားညီညွတ်ရေးအစိုးရ(NUG)၊ စီမံကိန်း၊ ဘဏ္ဍာရေးနှင့် ရင်းနှီးမြှပ်နှံမှုဝန်ကြီး ဦးတင်ထွန်းနိုင်ကဆိုထားသည်။
