တောင်ကိုရီးယားအစိုးရက မြန်မာနိုင်ငံသားများကို အထူးနေထိုင်ခွင့်ဗီဇာ ခွင့်ပြုပေးထား

တောင်ကိုရီးယားအစိုးရသည် ၎င်းတို့နိုင်ငံရောက် မြန်မာနိုင်ငံသားများကို ယာယီအထူးနေထိုင်ခွင့်ဗီဇာခွင့်ပြုထားကြောင်း ယင်းနိုင်ငံဆိုင်ရာ NUG ကိုယ်စားလှယ်ရုံးက ယနေ့ထုတ်ပြန်သည်။

အဆိုပါ အထူးနေထိုင်ခွင့်ဗီဇာ G1-99 အရ ကိုရီးယားရောက် မြန်မာနိုင်ငံသားများအနေဖြင့် မိမိတို့ကိုင်ဆောင်ထားသည့် နိုင်ငံကူးလက်မှတ်တွင် သက်တမ်းရှိခြင်း၊ မရှိခြင်းနှင့် မသက်ဆိုင်ဘဲ G1-99 ဗီဇာ သက်တမ်းတိုးပေးခြင်းအား ဆက်လက်ဆောင်ရွက်ပေးသွားမည်ဟု အသိပေးထားသည်။

မြန်မာပြည်တွင် စစ်အာဏာသိမ်းပြီးနောက်ပိုင်း ကိုရီးယားနိုင်ငံရှိ မြန်မာ့အရေးလှုပ်ရှားသူများ၏ တင်ပြ တောင်းဆိုချက်အရ ယခင် တောင်ကိုရီးယားအစိုးရက မြန်မာနိုင်ငံသားများကို လူသားချင်းစာနာသည့် ယာယီနေထိုင်ခွင့်ဗီဇာ G1-99 ဗီဇာအား ထုတ်ပေးရန် ဆုံးဖြတ်ခဲ့ခြင်းဖြစ်သည်ဟု NUG ကိုယ်စားလှယ်ရုံးက ထုတ်ပြန် သည်။

ကိုရီးယား တရားရေးဝန်ကြီးဌာနသည် ၂၀၂၁ မတ်လ ၁၂ရက်တွင် G1-99 ဗီဇာအား အထူးနေထိုင်ခွင့် ဗီဇာအဖြစ်သတ်မှတ်ကာ မြန်မာနိုင်ငံသားများ အနေဖြင့် အမိမြန်မာပြည် တည်ငြိမ်အေးချမ်းသည်အထိ ကိုရီးယားနိုင်ငံတွင် ခိုလှုံနေထိုင်နိုင်ရန် ရည်ရွယ်ပြီး ပထမဆုံး ထုတ်ပေးခဲ့သည်ဟု ဆိုသည်။

Public Service Announcement

လက်ရှိတွင် ရုရှား၏ ကျူးကျော်စစ်ကို ခံစားနေရသည့် ယူကရိန်းနိုင်ငံသားများကိုလည်း မြန်မာနိုင်ငံသားများကဲ့သို့ G1-99ဗီဇာဖြင့် အထူးနေထိုင်ခွင့်ပေးထားသည်ဟု သိရသည်။