စစ်အာဏာရှင်အဆုံးသတ်ရေး တိုက်ပွဲဝင်ရန်အချိန်ကောင်းဟု တိုင်းရင်းသား လူမျိုးအားလုံးကို ဖိတ်ခေါ်
တိုင်းသူပြည်သား တစ်ရပ်လုံးနီးပါး အစာရေစာငတ်ပြတ်မှု၊ ဖျားနာမှု ၊ သားသမီးများအနာဂတ်မဲ့ရမှုများစသည့် အတိဒုက္ခများ ကြုံနေရသည့် အခြေအနေမှ လွန်မြောက်ရန်အတွက်အားလုံး စည်းလုံးညီညွတ်စွာလက်တွဲ ဆောင်ရွက်ရန် လိုအပ်ကြောင်း ကရင်နီအမျိုးသားတိုးတက်ရေးပါတီ (KNPP) ဥက္ကဋ္ဌ ခူဦးရယ်က ပြောကြားသည်။
ယနေ့(ဩဂုတ် ၉ရက်) ကျရောက်သည့် (၇၄)နှစ်မြောက် ကရင်နီအမျိုးသားခုခံ တော်လှန်ရေးနေ့တွင် ခူဦးရယ်က မိန့်ခွန်းပြောကြားစဉ် အထက်ပါအတိုင်း ပြောဆိုခဲ့သည်။
“ ဆိုးဝါးလွန်းတဲ့ အခြေအနေကို အခွင့်အလမ်းကောင်း တစ်ခုအနေနဲ့ ဆုပ်ကိုင် ပြီးတော့ ကျွန်တော်တို့ကျောချင်းကပ် ရင်ချင်းအပ်ဖို့၊ နောက် ကျွန်တော်တို့ကို ဖိနှိပ်ညှင်းဆဲ သတ်ဖြတ်နေတဲ့ လူအုပ်စုကို ကျနော်တို့ အမြစ်ပြတ်ဖြိုခွင်း ပြီးတော့ ကျနော်တို့ အတူတကွ ငြိမ်းချမ်းသာယာတဲ့ တိုင်းပြည် အတွင်းမှာ အေးအတူ ပူအမျှ ယှဉ်တွဲနေထိုင်ပြီး သာယာ၀ပြောတဲ့ တိုင်းပြည်တစ်ခု ပေါ်ပေါက်ဖို့အတွက် ကျနော်တို့ ကြိုက်နှစ်သက်တဲ့ ကျနော်တို့ ပြည်သူလူထုကို တကယ်ပဲ အကျိုးပြုတဲ့ အစိုးရ တစ်ခု ပေါ်ပေါက်ရေးအတွက် ကျနော်တို့ ကြိုးပမ်းကြရမှာပဲဖြစ်ပါတယ်” ဟု ခူဦးရယ်က ပြောသည်။
ထိုသို့ ကြိုးပမ်းရာတွင် ကရင်နီ ပြည်သူ တစ်စုတည်း ရုန်းကန်တိုက်ပွဲဝင်၍ ပြီးမည့်ကိစ္စမဟုတ် သည်မှာ သေချာကြောင်း ၎င်းက ဆိုသည်။
Public Service Announcement
“ဒီနေ့ ကျရောက်တဲ့ ကရင်နီအမျိုးသားခုခံတော်လှန်ရေးနေ့ မှာ တခြားသော ဘ၀တူ တိုင်းရင်းသား လူမျိုးများကိုလည်း ကျနော်တစ်ခါတည်း ဖိတ်ခေါ်ချင် တာက ကျွန်တော်တို့ ကရင်နီအမျိုးသား တစ်ရပ်လုံးနဲ့ရပ်တည်ပြီးတော့ ဒီစစ်အာဏာရှင်အဆုံးသတ်ရေးနဲ့ ငြိမ်းချမ်းသာယာတဲ့ တိုင်းပြည် တစ်ခု ဖော်ဆောင်ဖို့ ကျနော်တို့ တတွေဟာ ဖက်ဒရယ်ပြည်ထောင်စုကို တည်ဆောက်ကြ မယ်ဆိုတဲ့ အဓိဌာန်နဲ့ ကျနော်တို့ ကတိကဝတ်ပြုခဲ့ ကြပြီးဖြစ်တယ်။ ဒီအခြေခံအောက်မှာ ကျနော်တို့ အတူတကွ ဆိုးအတူ ကောင်းဖက် ဒီတိုက်ပွဲကို အမြန်ဆုံး ကျွန်တော်တို့ အောင်နိုင်ဖို့အတွက် တိုက်ပွဲဝင်ကြဖို့ အချိန်ကောင်း အခါကောင်းဖြစ်တယ်” ဟု ခူဦးရယ်က ပြောသည်။
ကရင်နီအမျိုးသားခုခံတော်လှန်ရေးနှစ် ၇၀ ကျော်ကာလအတွင်း လက်ရှိ အချိန်လောက် အခွင့်ခါကောင်းကို မတွေ့ဖူး၍ အခွင့်အလမ်းကောင်းကို အသုံးပြုပြီး လက်တွဲတိုက်ပွဲဝင်ရန်လိုအပ်သည်ဟု ၎င်းက ပြောကြားသည်။
