စစ်ကောင်စီတပ်အားမိုင်းဆွဲတိုက်ခိုက်ခဲ့သည့်နေရာမှကျည်များ၊ ဗုံးသီးနှင့်စစ်အသုံးအဆောင်များကို မြိုင်ပကဖ ရရှိ

■နှစ်ရက်ဆက် တိုက်ခိုက်မှုများအတွင်း စစ်ကောင်စီတပ်မှ ၈ ဦးသေ

မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)ကစစ်ကောင်စီတပ်များကို နှစ်ရက်ဆက် မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ၈ ဦးသေဆုံးခဲ့ပြီး ယင်းနေရာမှာ ကျည်ဆံ၊ ဗုံးသီးနှင့် စစ်အသုံးအဆောင် ပစ္စည်းများရရှိခဲ့ကြောင်း မြိုင်ပကဖက ယနေ့ သတင်းထုတ်ပြန်သည်။

မြိုင်မြို့နယ်တဲကြီးရွာနှင့် နယ်သတ်ရွာကြားတွင် ဩဂုတ် ၁၅ရက်နှင့် ၁၆ရက်က စစ်ကောင်စီတပ်များကို မြိုင် ပကဖ က မိုင်းဆွဲတိုက်ခိုက်ခဲ့ခြင်းဖြစ်သည်။

ဩဂုတ် ၁၅ရက်က ရိက္ခာပို့လာသည့် စစ်ကောင်စီကား ၂စီးကို မိုင်းဖြင့်တိုက်ခိုက်ခဲ့ရာ စစ်ကောင်စီတပ်မှ ၁ဦး သေ ၃ဦး ဒဏ်ရာရခဲ့ကြောင်း ၊ ထို့ပြင် ကင်းပုန်းဝပ်နေသည့် စစ်ကောင်စီတပ်သား ၄ဦးကကြောက်လန့်ပြီးသစ်ပင်အောက်ဝင်ပုန်းခဲ့ရာ မိုင်းဖြင့် ထပ်မံ တိုက်ခိုက်ခဲ့၍ စစ်ကောင်စီတပ်ဖွဲ့ဝင် ၃ဦး သေဆုံးပြီး ၁ဦး ဒဏ်ရာရခဲ့ကြောင်း မြိုင်ပကဖ က ထုတ်ပြန်ထားသည်။

ဩဂုတ် ၁၆ရက်တွင်လည်း ဩဂုတ် ၁၅ရက်က တိုက်ခိုက်သည့် နေရာသို့ ကင်းပုန်းလာဝပ်သည့် စစ်ကောင်စီတပ်များကို မိုင်းဖြင့် တိုက်ခိုက်ခဲ့ရာ စစ်ကောင်စီတပ်သား ၃ဦးသေဆုံးပြီး ၂ဦး ဒဏ်ရာရခဲ့သည်ဟုဆိုသည်။

Public Service Announcement

ထို့ကြောင့် မြိုင် ပကဖ ၏ နှစ်ရက်ဆက်တိုက်ခိုက်မှုကြောင့် စစ်ကောင်စီတပ်မှ အနည်းဆုံး ၇ဦးသေဆုံးပြီး ထိခိုက်ဒဏ်ရာရသူများ ရှိခဲ့သည်။

သို့ရာတွင် ယနေ့ မြိုင်ပကဖ ၏ ထုတ်ပြန်ချက်တွင် တိုက်ခိုက်မှုများကြောင့် သေဆုံးသွားသည့် စစ်ကောင်စီတပ်ဖွဲ့ဝင် ၈ဦး ၏ အလောင်းနှင့် ဒဏ်ရာရသူ ၂ဦးအား စစ်ကောင်စီတပ်က ကားဖြင့် လာရောက်သယ်ဆောင်သွားသည်ဟု ဖော်ပြထားသည်။