စစ်ကိုင်းတိုင်း၊ မြောင်မြို့နယ်တွင် စစ်ကောင်စီတပ်က တိုက်ပွဲမဖြစ်ဘဲ လက်နက်ကြီးဖြင့် ပစ်ခတ်ခဲ့၍ အမျိုးသားနှစ်ဦးသေဆုံးခဲ့ကြောင်း သတင်းရရှိသည်။
ယနေ့(သြဂုတ် ၃၁ ရက်) နံနက်ပိုင်းက မြောင်မြို့နယ်အတွင်းသို့ စစ်ကြောင်းထိုးလာသော စစ်ကောင်စီတပ်သည် နံနက် ၁၁ နာရီခန့်တွင် ကျောက်ရစ်အနောက်ရွာအနောက်ဘက်မှ တိုက်ပွဲမရှိဘဲ ဇီးကျွန်းကျေးရွာဘက်သို့ (၆၀)မမ လက်နက်ကြီးဖြင့် ပစ်ခတ်ခဲ့သည်။
စစ်ကောင်စီတပ်က လက်နက်ကြီး ၂ ချက်ပစ်ခတ်ခဲ့ရာ ဇီးကျွန်းကျေးရွာဘက်သို့ ကျရောက်ပြီး ဒေသခံအမျိုးသားနှစ်ဦးသေဆုံးကာ အမျိုးသမီး နှစ်ဦး ဒဏ်ရာရရှိသွားကြောင်း၊ သေဆုံးသူနှစ်ဦးမှာ အသက် (၃၂)နှစ်အရွယ် ကိုကျော်စွာသိန်းနှင့် အသက် (၄၂) နှစ်အရွယ် ကိုခင်မောင်ဦးတို့ဖြစ်ကြောင်း မြောင်ဗိုလ်တောက်ထွန်း အဖွဲ့က ပြောသည်။
စစ်ကောင်စီတပ်သည် ရေစကြိုမြို့နယ်မှ ကူးလာခဲ့ခြင်းဖြစ်ပြီး အင်အား ၁၀၀ခန့်ပါသည်ဟု ဒေသခံများက ပြောသည်။
Public Service Announcement
စစ်ကောင်စီတပ်၏ ပစ်ခတ်မှုကြောင့် ဒေသခံပြည်သူ ၂ထောင်ကျော် ထွက်ပြေးတိမ်းရှောင်နေရကြောင်း မြောင် CDSOM အဖွဲ့က ပြောသည်။
