စစ်ကိုင်းတိုင်း၊ ပုလဲမြို့နယ်မှ မကွေးတိုင်း၊ မြိုင်မြို့နယ်သို့ ထွက်ခွာလာသော စစ်ကောင်စီတပ် စစ်ကြောင်းသုံးကြောင်းအား ရှေ့ထွက်မိုင်းများဖြင့် ဖောက်ခွဲတိုက်ခိုက်ခဲ့ရာ ထိခိုက်ဒဏ်ရာများ ရရှိသွားကြောင်း ကျားသစ်နက်ပြောက်ကျားတပ်ဖွဲ့က ထုတ်ပြန်သည်။
စက်တင်ဘာ ၆ ရက်က ပုလဲမြို့မှ ထွက်ခွာလာသော အင်အား ၁၃၅ဦးခန့်ပါ စစ်ကောင်စီတပ်သည် စစ်ကြောင်းသုံးကြောင်းဖြင့် ဖြန့်ကျက်ထွက်လာကြစဉ် မြိုင်မြို့နယ်၊ ကံကြီးကျေးရွာအနီးအရောက်တွင် တိုက်ခိုက်ခံခဲ့ရခြင်းဖြစ်သည်။
Mytel ပိုက်ဖြင့် ဆင်ထားသော အင်အားပြင်း နှစ်ဆင့်ကွဲ ရှေ့ထွက်မိုင်းများဖြင့် အသင့်စောင့် ဆိုင်း မိုင်းဆွဲတိုက်ခိုက်ခဲ့ရာ အများအပြားဒဏ်ရာရရှိသွားခဲ့ကြကြောင်း ကျားသစ်နက်ပြောက်ကျားတပ်ဖွဲ့၏ ထုတ်ပြန်ချက်တွင် ဖော်ပြသည်။
ဒဏ်ရာရ စစ်ကောင်စီတပ်ဖွဲ့ဝင်များသည် အနီးနားကျေးရွာအတွင်းသို့ ဝင်ရောက်ကာ ပြည်သူ့နေအိမ်များထဲသို့ ဝင်ရောက်ပြီး ပုဆိုး၊သဘက်တို့ဖြင့် ဒဏ်ရာများကို စည်းနှောင်ပြီး ထမ်းပိုးသွားကြောင်း နယ်မြေခံများပြောပြချက်အရ သိရှိရသည်ဟု ကျားသစ်နက်ပြောက်ကျားတပ်ဖွဲ့က ဆိုသည်။
Public Service Announcement
နယ်မြေရှင်းလင်းရေးများ ပြန်လုပ်သည့်အခါ၌ ထိုကျေးရွာအတွင်း သွေးအိုင်များ တွေ့ရှိခဲ့ရ၍ ဒဏ်ရာရရှိသည်ကို အတည်ပြုနိုင်ခဲ့သည်ဟု ကျားသစ်နက်ပြောက်ကျားတပ်ဖွဲ့က အသိပေးသည်။
အဆိုပါစစ်ဆင်ရေးအား ကျားသစ်နက်ပြောက်ကျားတပ်ဖွဲ့ ယင်းမာပင်ခရိုင်တပ်ရင်း (၁၁)၊ပုလဲတပ်ရင်း (၅)မှ မိုင်းအဖွဲ့တို့က တိုက်ခိုက်ခဲ့ခြင်းဖြစ်သည်။
ဖြစ်စဥ်နှင့်ပတ်သက်ပြီး ကျားသစ်နက် ပြောက်ကျားတပ်ဖွဲ့တာဝန်ရှိသူက ” သူတို့ဘက်က ၁၅ ယောက်လောက်ထိသွားတယ်။ မိုင်းရှိမှန်းမသိဘံ မိုင်းကွင်းထဲရောက်လာတာ။”ဟု ပြောသည်။
သို့သော် People’s Springက ထပ်မံအတည်ပြုနိုင်ခြင်းမရှိသေးပေ။
ကျားသစ်နက်ပြောက်ကျားတပ်ဖွဲ့သည် ပြီးခဲ့သည့် စက်တင်ဘာ ၁ ရက်နှင့် ၂ ရက်တွင်လည်း မြိုင်မြို့နယ်၊ ကန်နီရွာတွင်တပ်စွဲထားသော စစ်ကောင်စီတပ်နှင့် ပျူစောထီးများအား ဒေသတွင်းမဟာမိတ်အဖွဲ့များနှင့်အတူ နှစ်ရက်ဆက် တိုက်ခိုက်ခဲ့ရာ တိုက်ပွဲပြင်းထန်ခဲ့ပြီး စစ်ကောင်စီတပ်နှင့်ပျူများ ထိခိုက်သေဆုံးမှုရှိခဲ့သည်။
