စစ်ကိုင်းတိုင်း ကောလင်းမြို့နယ်တွင် ယနေ့မနက်က စစ်ကောင်စီယာဉ်တန်း မိုင်းဖြင့် တိုက်ခိုက်ခံရ၍ စစ်ကောင် စီတပ်ဖွဲ့ဝင်များသေဆုံးဒဏ်ရာရမှုများပြားကြောင်း ကောလင်းဒေသခံက ပြောသည်။
ရွှေဘို -မြစ်ကြီးနားလမ်း၊ ကောလင်းနှင့် ကန့်ဘလူမြို့နယ်ကြား ဥတုန်းမင်ဒေသ၌ ဖြစ်ပွားခဲ့သည်ဟု သိရကြောင်း ၎င်းကဆိုသည်။
“ခုနစ်စီးလာတာကို ၂စီးခွဲတာလို့ ပြောတယ်။ ဥတုန်းမင်နားမှာ ပြောတယ်။ ထိခိုက်ဒဏ်ရာရ ၈၀လောက်လို့ ပြောတယ်။ အတိအကျတော့မသိဘူး”ဟု ကောလင်းဒေသခံက ပြောသည်။
ယမန်နေ့ညပိုင်းက ကောလင်းမြို့ပေါ်၌စစ်ကောင်စီတပ်က သေနတ်ပစ်ဖောက်မှုများ ပြုလုပ်ခဲ့သော်လည်း ယနေ့ တွင် မြို့ပေါ်၌ ထူးခြားမှုမရှိဟု ၎င်းက ဆိုသည်။
Public Service Announcement
စစ်ကိုင်းတိုင်းဒေသခံတစ်ဦးကလည်း “ရွှေဘို-မြစ်ကြီးနားလမ်းပေါ် ကောလင်းနယ်ထဲမှာ ဒီလိုဖြစ်တယ်ဆိုတာ ကောလင်းဘက်က ပြောလာတာ သိရတယ်”ဟု ပြော သည်။
ကောလင်းဒေသတွင် ယခင်ကလည်း စစ်ကောင်စီတပ်များကို ဒေသခံပြည်သူ့ ကာကွယ်ရေးတပ်ဖွဲ့(PDF)များက တိုက်ခိုက်မှုအချို့လုပ်ဆောင်ခဲ့သည်။ ယခုတိုက်ခိုက်မှုကို မည်သည့်အဖွဲ့က လုပ်ဆောင်သည်ကို မသိရသေးပေ။ ကောလင်း PDFအနေဖြင့်လည်း ယခုဖြစ်စဉ်နှင့်ပတ်သက်ပြီး သတင်းထုတ်ပြန်ထားခြင်းမရှိပေ။ ယခင် တိုက်ခိုက်မှုများတွင်လည်း ကောလင်း PDFအနေဖြင့် သတင်းထုတ်ပြန်ခြင်းမပြုခဲ့ပေ။
