မည်သည့်တရားရုံးတွင်မဆို တရားစီရင်နိုင်သည့် တစ်ကမ္ဘာလုံးဆိုင်ရာ တရားစီရင်ပိုင်ခွင့်နယ်ပယ်နှင့် အခြေခံသဘောတရားကို အသုံးပြုကာ စစ်အာဏာ ရှင်များကို တရားစီရင်နိုင်ရန် အင်အားစိုက်ထုတ်နေသည့် ကြိုးပမ်းမှု အားလုံးကို ကြိုဆိုကြောင်း သံအမတ်ကြီး ဦးကျော်မိုးထွန်းက ကုလသမဂ္ဂ၌ ပြောသည်။
မြန်မာပြည်သူများအပေါ် စစ်တပ်ကျူးလွန်သည့် စစ်ရာဇဝတ်မှုများနှင့် လူသားမျိုးနွယ်ကို ဆန့်ကျင်သော ရာဇ၀တ်မှုများနှင့်ပတ်သက်၍ ပြစ်မှုကျူးလွန်သူများကို ဖြစ်နိုင်သည့် နည်းလမ်းဖြင့် မဖြစ်မနေ အပြစ်ပေးအရေးယူကာ ပြစ်ဒဏ်ချမှတ်ရမည်ဖြစ်ကြောင်း သံအမတ်ကြီးက အောက်တိုဘာ ၁၂ ရက်တွင် အထွေထွေညီလာခံသို့ ပြောသည်၊
အမျိုးသားညီညွတ်ရေးအစိုးရက တစ်ကမ္ဘာလုံးဆိုင်ရာ တရားစီရင်ပိုင်ခွင့်နယ်ပယ်နှင့် အခြေခံသဘောတရားကိုအသုံးချမှုနှင့်ပတ်သက်၍ အပြု သဘောဆောင်သည့် ကောင်းမွန်သောရလဒ်များ ထွက်ပေါ်လာမည်ဟု မျှော်လင့်ပြီး သက်ဆိုင်သူများအားလုံးနှင့် ပူးပေါင်းဆောင်ရွက်သွားမည် ဖြစ်ကြောင်းလည်း သံအမတ်ကြီးက ဆက်ပြောသည်။
မြန်မာနိုင်ငံသည် ၂၀၂၁ ဖေဖော်ဝါရီတွင် တရားမဝင်စစ်အာဏာသိမ်းမှုဖြစ်စဉ် ဖြစ်ပေါ်ခဲ့ချိန်မှအစပြု၍ စိန်ခေါ်မှုမြောက်များစွာကို ရင်ဆိုင်လျက်ရှိပြီး ပြည်သူများ၏ ဆန္ဒမှန်ကိုဆန့်ကျင်သည့် မလိုလားအပ်သောဒုက္ခများကို ပြည်သူများကြုံတွေ့နေရကြောင်း သံအမတ်ကြီးက အစီရင်ခံသည်။
Public Service Announcement
လူမဆန်သည့် စစ်တပ်အနေဖြင့် စစ်ရာဇဝတ်မှုနှင့် လူသားမျိုးနွယ်အပေါ်ကျူးလွန်သည့် ရာဇဝတ်မှုများအပါအဝင် နိုင်ငံတကာလူသားချင်းဆိုင်ရာဥပဒေနှင့် လူ့အခွင့်အရေးတို့ကိုလည်း အဆက်မပြတ် ကျူးလွန်လျက်ရှိကြောင်း ဆက်ပြောသည်။
မြန်မာစစ်တပ်သည် တရားဥပဒေစိုးမိုးမှု၊ စံနှုန်းနှင့် အခြေခံမူများကို မျက်ကွယ်ပြုခြင်း၊ အထူးသဖြင့် မြန်မာပြည်သူများ၏ ဆန္ဒကို လုံးလုံးလျားလျား မျက်ကွယ်ပြုခြင်းတို့ကြောင့် ပြည်သူများအနေဖြင့် လူကဖန်တီး၍ ဖြစ်ပေါ်လာသော ဆိုးကျိုးများ၏ နောက်ဆက်တွဲ လူမှု-စီးပွားဘဝနှင့် လုံခြုံရေးကျဆင်းမှု တို့ကို ရင်ဆိုင်ကြုံတွေ့နေရပြီး ဆင်းရဲနွမ်းပါးမှု၊ စားနပ်ရိက္ခာမလုံခြုံမှု၊ လိင်ပိုင်းဆိုင်ရာအကြမ်းဖက်မှု၊ ကလေးငယ်များအပါအဝင် အခြားသောလူကုန်ကူးမှုများ၊ နေရပ်စွန့်ခွာမှုများနှင့် ဒုက္ခသည်များဖြစ်နေရခြင်း တို့မှာ ပြည်သူများနေ့စဉ်ကြုံတွေ့နေရသည့် အခက်အခဲများဖြစ်ကြောင်း သံအမတ်ကြီးက ရှင်းပြသည်။
