နမ့်ခမ်းတွင် စစ်ကောင်စီတပ်မှ ဒုတပ်ကြပ်တစ်ဦးကလက်ပစ်ဗုံးခြောက်လုံးနှင့် ကျည်ဆန်များယူဆောင်လာကာ စစ်တပ်ကို စွန့်ခွာပြီး ပြည်သူ့ကာကွယ်ရေးတပ်ဖွဲ့ထံ လာရောက်ပူးပေါင်း၍ စစ်ကောင်စီတပ်ကိုပြန်လည်ခုခံတိုက်ခိုက်နေသည်။
မူဆယ်ခရိုင်၊ နမ့်ခမ်းအခြေစိုက် စကခ(၇)လက်အောက်ခံ ခမရ(၄၂၄)တပ်စခန်းမှ ကိုယ်ပိုင်အမှတ် (တ/၂၀၅၂၇၇) ဒုတပ်ကြပ် စိုးထိုက် သည်စစ်အာဏာရှင် လက်အောက် တွင်တာဝန်ထမ်းဆောင်စိတ်လုံးဝ မရှိတော့သည့်အတွက် ပြည်သူများနှင့်အတူ လက်တွဲပူပေါင်း သွားမည်ဟု ဆုံးဖြတ်ချက်ချ၍ ပြည်သူ့ရင်ခွင်သို့ ခိုလှုံလာသည်ဟု ရှမ်းမြောက် ပြည်သူ့လုံခြုံရေးနှင့် ကာကွယ်ရေးတပ်ဖွဲ့(PSDA)က သတင်းထုတ်ပြန်ထားသည်။
“ဒုတပ်ကြပ် စိုးထိုက်က လက်ဗစ်ဗုံး ၆ လုံးယူလာတယ်။ ကျည်ဆန်တွေလည်းပါတယ်။ သူက ကျွန်တော်တို့နဲ့ပေါင်းပြီး စစ်ကောင်စီကို ပြန်တိုက်နေတယ်” ဟု PSDAသတင်းထုတ်ပြန်ရေးတာဝန်ခံကပြောသည်။
ဒုတပ်ကြပ် စိုးထိုက်သည် ဇွန် ၇ရက်တွင်လာရောက်ပူးပေါင်းခြင်းဖြစ်သော်လည်း PSDA ကနိုဝင်ဘာလ ၉ရက်မှသာ သတင်းထုတ်ပြန်ခြင်းဖြစ်သည်။
Public Service Announcement
နမ့်ခမ်းမြို့နယ်အပါအဝင် ရှမ်းပြည်နယ်မြောက်ပိုင်း မြို့နယ်အချို့တွင် မြောက်ပိုင်းမဟာမိတ်တပ်များနှင့်ပြည်သူ့ကာကွယ်ရေးတပ်ဖွဲ့များကစစ်ကောင်စီကိုတိုက်ခိုက်နေသည်။
ယမန်နေ့ကလည်း ရှမ်းပြည်နယ်မြောက်ပိုင်းကျောက်မဲမြို့မှ ခရိုင်ရဲတပ်ဖွဲ့ မှူးရုံးကို လက်ပစ်ဗုံးဖြင့် ပြည်သူ့ကာကွယ်ရေးတပ်ဖွဲ့က ပစ်ခတ်တိုက်ခိုက်ခဲ့သည်။
