မြန်မာနိုင်ငံမှာ လေးလကြာအပစ်အခတ်ရပ်စဲဖို့ အာဆီယံအထူးကိုယ်စားလှယ်က တောင်းဆိုလိုက်ပါတယ်။
အခုစက်တင်ဘာလလယ်မှာ လူသားချင်းစာနာမှုအကူ အညီ ပထမဆုံးအသုတ်ကို အဆင်ပြေချောမွေ့စွာပေးအပ်နိုင်ဖို့ မြန်မာနိုင်ငံမှာရှိတဲ့ လက်နက်ကိုင်အားလုံးကို လေးလကြာ ရပ်တန့်ထားဖို့ အထူးကိုယ်စားလှယ်က တိုက်တွန်းခဲ့တာဖြစ်ပါတယ်။
အာဆီယံအထူးကိုယ်စားလှယ် Erywan Yusof ဟာ ဂျပန်သတင်းဌာန Kyodo News နဲ့ သီးသန့် အင်တာ ဗျူးမှာ သူ့အနေနဲ့ စစ်ကောင်စီကခန့်အပ်တဲ့ နိုင်ငံခြား ရေးဝန်ကြီး ၀ဏ္ဏမောင်လွင်ကို ဗီဒီယိုကွန်ဖရင့်နဲ့တွေ့ဆုံခဲ့ရာမှာ ဒီနှစ်ကုန်အထိ အပစ်အခတ်ရပ်စဲဖို့တောင်းဆိုခဲ့ပြီး အဲဒီတောင်းဆိုမှုကို မြန်မာစစ်တပ်က သဘောတူခဲ့တယ်လို့ ဆိုပါတယ်။
“ဒါက နိုင်ငံရေးဆိုင်ရာ အပစ်အခတ်ရပ်စဲရေးမဟုတ်ပါဘူး။ ဒါက လုံခြုံစေဖို့၊ လူသားချင်းစာနာမှုဆိုင်ရာအလုပ်သမားတွေအတွက် လုံခြုံရေးအတွက် အပစ်အခတ်ရပ်စဲရေးဖြစ်ပါတယ်” လို့ အထူးကိုယ်စားလှယ်က ပြောပါတယ်။
Public Service Announcement
အာဆီယံရဲ့ မြန်မာနိုင်ငံဆိုင်ရာ အထူးကိုယ်စားလှယ်ကို ပြီးခဲ့တဲ့ ဩဂုတ်လဆန်းမှာ ခန့်အပ်ခဲ့ပြီး အဲဒီကိုယ်စား လှယ်ဟာ အခုအချိန်အထိ မြန်မာနိုင်ငံကို လာရောက်နိုင်ခြင်းမရှိသေးဘဲ လူထု ခေါင်းဆောင် ဒေါ်အောင်ဆန်းစုကြည်နဲ့ တွေ့ဆုံခွင့်အပါအဝင် မြန်မာနိုင်ငံကို လာရောက်ခွင့်ရရှိရေး ကြိုးစားနေဆဲပါ။
ကိုးကား – Bangkok Post
