စစ်ကိုင်းတိုင်း၊ ရွှေဘို – ကျောက်မြောင်းလမ်းပိုင်းတွင် စစ်ကောင်စီအရာရှိအပါအဝင် စစ်အုပ်စုလိုက်ပါလာသော Kluger ယာဥ်တစ်စီးအား မိုင်းဆွဲတိုက်ခိုက်ခဲ့ရာ ထိခိုက်သေဆုံးမှုရှိကြောင်း BurmaRangers (ShweBo)အဖွဲ့က သတင်းထုတ်ပြန်သည်။
ယမန်နေ့ (ဒီဇင်ဘာ ၁၆ ရက်) နံနက် ၁၁နာရီခန့်က ရွှေဘိုမြို့နယ်၊ ရွှေဘို – ကျောက်မြောင်းလမ်းပိုင်းတွင် ကျောက်မြောင်းမှ ရွှေဘိုမြို့သို့လာသည့် စစ်ကောင်စီအရာရှိတစ်ဦးနှင့် တပ်ဖွဲ့ဝင် ငါးဦးလိုက်ပါလာသည့် Klugerအဖြူရောင်ယာဥ်အား အုန်းပေါက်ကျေးရွာ အနောက်ဘက်တွင် ပဒေသာမိုင်း (၈)လုံးဖြင့် တိုက်ခိုက်ခဲ့ကြောင်း BurmaRangers (ShweBo)အဖွဲ့က အသိပေးသည်။
ထိုသို့တိုက်ခိုက်မှုကြောင့် စစ်ကောင်စီတပ်ဖွဲ့ဝင် ငါးဦး ပွဲချင်းပြီးသေဆုံးပြီး ကားမောင်းသမားမှာ မိုင်းထိဒဏ်ရာဖြင့် ရွှေဘိုမြို့သို့ဆက်လက်မောင်းနှင်သွားရာ ရွှေဘိုအရောက် သေဆုံးသည်ဟု BurmaRangersအဖွဲ့က ဆိုသည်။
ဖြစ်စဥ်နှင့်ပတ်သက်၍ BurmaRangersအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထို့အပြင် စစ်အုပ်စု၏ ထိခိုက်သေဆုံးမှုအား ထပ်မံအတည်ပြုနိုင်ခြင်း မရှိသေးပေ။
Public Service Announcement
ရွှေဘို – ကျောက်မြောင်းလမ်းပိုင်းတွင် စစ်ကောင်စီယာဥ်များအား ဒေသတွင်း PDFများက မကြာခဏ မိုင်းဆွဲတိုက်ခိုက်လေ့ရှိသည်။
