ပြဇာတ်ဆန်ဆန် အလှည့်အပြောင်းတွေနဲ့ စိတ်လှုပ်ရှားစရာ မိနစ်ပေါင်း ၁၂၀ ကျော်ကို ယှဉ်ပြိုင်ပြီး ပင်နယ်တီ အဆုံးအဖြတ်မှာတော့ အာဂျင်တီးနားက ပြီးခဲ့တဲ့ ပြိုင်ပွဲရဲ့ ချန်ပီယံ ပြင်သစ်ကို အနိုင်ယူပြီး ကမ္ဘာ့ဖလားကြီးကို ဆွတ်ခူးသွားနိုင်ခဲ့ပြီ ဖြစ်ပါတယ်။
ဒီပွဲမှာ အာဂျင်တီးနားက ဦးဆောင်ဂိုးတွေသွင်းရင်း၊ ပြင်သစ်ကလည်း အကြိမ်ကြိမ် ချေပရင်းနဲ့ ပရိသတ်တွေကို ရင်တထိတ်ထိတ်ဖြစ်အောင် ဖမ်းစားနိုင်ခဲ့ပါတယ်။ ပထမပိုင်းမှာတော့ အာဂျင်တီးနားအတွက် လီယွန်နယ် မက်ဆီရဲ့ ပင်နယ်တီ သွင်းဂိုးရယ်၊ အန်ဟဲလ် ဒီမာရီယာရဲ့ ဂိုးရယ်ကြောင့် နှစ်ဂိုးပြတ် ဦးဆောင်နိုင်ခဲ့ပါတယ်။
ပြင်သစ်ဟာ ပွဲချိန် မိနစ် ၇၀ လောက်ထိ အာဂျင်တီးနားရဲ့ ခံစစ်ကို ဖောက်ထွက်ဖို့ အဖြေရှာမတွေ့ဘဲ ရုန်းကန်နေခဲ့ရပါတယ်။ အဲဒီနောက် နည်းပြ ဒီဒီရာ ဒက်စ်ချမ့်က ခြေစွမ်းမပြနိုင်တဲ့ ကွင်းလယ် ဖန်တီးရှင် အန်ထော်နီ ဂရိဇ်မန်းနဲ့ နောက်ခံလူ သီယို ဟာနန်ဒက်ဇ်တို့ကိုထုတ်ပြီး မြန်နှုန်းမြင့် ကစားသမားတွေဖြစ်တဲ့ မားကက်စ် သူရမ်၊ ကင်စလေ ကိုးမန်းတို့ကိုထည့်ပြီး နည်းဗျူဟာ အပြောင်းအလဲ လုပ်ခဲ့ပါတယ်။ အာဂျင်တီးနား ခံစစ်ဟာ ရုတ်တရက် ကွဲပြားသွားတဲ့ ပြင်သစ်ရဲ့ တိုက်စစ် ကစားပုံမှာ အငိုက်မိပြီး ပင်နယ်တီ တစ်လုံး အပါအဝင် တိုက်စစ်မှူး ကိုင်လီယန် အမ်ဘက်ပီက နှစ်မိနစ်အတွင်း နှစ်ဂိုးဆက် သွင်းယူလို့ မိနစ် ၉၀ ပြည့်သွားချိန်မှာ နှစ်ဂိုးစီ သရေ ဖြစ်နေခဲ့ပါတယ်။
အချိန်ပို မိနစ် ၃၀ ဆက်ကစားရာမှာလည်း အာဂျင်တီးနားဖက်က မက်ဆီနဲ့ ပြင်သစ်ဖက်က အမ်ဘက်ပီတို့က တစ်ဂိုးစီ ထပ်သွင်းနိုင်တာကြောင့် သုံးဂိုးစီ သရေနဲ့ ပွဲပြီးခဲ့ပြန်ပါတယ်။ အမ်ဘက်ပီကတော့ အခုနှစ် ကမ္ဘာ့ဖလားမှာ သွင်းဂိုး အများဆုံး ရွှေဖိနပ် ပိုင်ရှင်ဆုကိုပါ ၈ ဂိုးနဲ့ ဆွတ်ခူးသွားနိုင်ခဲ့ပါတယ်။
Public Service Announcement
ပင်နယ်တီ ကန်သွင်းရာမှာတော့ ပြင်သစ်ဖက်က ကိုးမန်းနဲ့ အော်ရီလီယန် ချူမန်နီတို့ ဂိုးမဝင်ခဲ့ဘဲ အာဂျင်တီးနားက ၄ လုံးဆက်တိုက် အမှားအယွင်းမရှိ ကန်သွင်းနိုင်ခဲ့တာကြောင့် ချန်ပီယံဆုကို ဆွတ်ခူးနိုင်ခဲ့တာ ဖြစ်ပါတယ်။ တောင်အမေရိက ထိပ်တန်း အသင်းအတွက်တော့ ကမ္ဘာ့ဖလားကို တတိယ အကြိမ်မြောက် ရရှိခဲ့တာဖြစ်ပြီး အသင်းခေါင်းဆောင် မက်ဆီကလည်း သူ့ရဲ့ နောက်ဆုံး ပါဝင်ယှဉ်ပြိုင်တဲ့ ကမ္ဘာ့ဖလားမှာ ချန်ပီယံဆုကို သိမ်းယူနိုင်ခဲ့ပြီး သမိုင်းတလျှောက် အငြင်းပွားစရာမရှိ အကောင်းဆုံး ဘောလုံးသမား တစ်ဦးအဖြစ် သက်သေထူသွားနိုင်ခဲ့ပါတယ်။ ပြင်သစ်ကတော့ ကမ္ဘာ့ဖလားကို နှစ်ကြိမ်ဆက် ဆွတ်ခူးနိုင်ဖို့ လက်တစ်ကမ်းထိ နီးစပ်ခဲ့ပြီးမှ ဒုတိယ နေရာနဲ့သာ ကျေနပ်ခဲ့ရပါတယ်။
