ရွေးကာက်ပွဲနှင့်ပတ်သက်၍ စစ်ခေါင်းဆောင်၏ နှစ်သစ်ပြောစကားကို KNU ပြောခွင့်ရသူက တုံ့ပြန်လိုက်သည်။
တိုင်းရင်းသားများ ဒီမိုကရေစီအခွင့်အရေး မဆုံးရှုံးစေရန်ဆိုပြီး တိုင်းရင်းသားဒေသအပါအဝင် တစ်နိုင်ငံလုံးနေရာအနှံ့တွင် ရွေးကောက်ပွဲကျင်းပနိုင်ရန် ကြိုးစားဆောင်ရွက်လျက်ရှိသည်ဟု အာဏာသိမ်းစစ်ခေါင်းဆောင်က နှစ်သစ်ကူးနှုတ်ခွန်းဆက်စကားတွင် ပြောဆိုလိုက်သည်။
လက်နက်ကိုင်ပဋိပက္ခများ ဖြေရှင်းနိုင်ပါက တိုင်းရင်းသားများနှင့် တိုင်းရင်းသားဒေသများ၏ အခွင့်အရေးကို ပိုမိုဆောင်ရွက်ပေးနိုင်မှာဖြစ်ပြီး တိုင်းရင်းသားလက်နက်ကိုင်အဖွဲ့များနှင့် ငြိမ်းချမ်းရေးအတွက် ဆွေးနွေးသည့်အပေါ်တွင် အလားအလာကောင်းသော သဘောတူညီမှုများ ရရှိခဲ့သည်ဟု စစ်ခေါင်းဆောင်က ဆိုသည်။
စစ်ခေါင်းဆောင်က ယခုလိုပြောဆိုနေသော်လည်း တကယ့်လက်တွေ့လုပ်ရပ်တွင် တိုင်းရင်းသားဒေသများအပါအဝင် နိုင်ငံတစ်ဝှမ်း၌ ထိုးစစ်ဆင်မှုများ အဆက်မပြတ်ပြုလုပ်နေပြီး လူ့အခွင့်အရေးချိုးဖောက်မှုများစွာကို စစ်ကောင်စီက ကျူးလွန်လျက်ရှိသည်။
Public Service Announcement
စစ်ကောင်စီ၏ ငြိမ်းချမ်းရေးဆွေးနွေးမှုနှင့် ယခုနှစ် (၂၀၂၃)ခုနှစ်တွင် ကျင်းပပြုလုပ်မည့် ရွေးကောက်ပွဲကိစ္စရပ်နှင့်ပတ်သက်ပြီး ကေအဲန်ယူ-ကရင်အမျိုးသားအစည်းအရုံး ပြောခွင့်ရသူ နိုင်ငံခြားရေးတာဝန်ခံ ပဒိုစောတောနီးက ယခုလို သုံးသပ်ပြောဆိုသည်။
“အမည်ခံငြိမ်းချမ်းရေးကို သူတို့ကြိုးစားပြီးတော့လုပ်တယ်။ ဒါပေမယ့် လုံး၀အရာမထင်ဘူးဆိုတာ လူတိုင်းသိတဲ့ကိစ္စ။ နောက်တစ်ချက်က အတုအယောင်ရွေးကောက်ပွဲကို လုပ်ဖို့ သူတို့က အားထုတ်လာတယ်။ ဒီအတုအယောင်ရွေးကောက်ပွဲ လွတ်လပ်မှု တရားမျှတမှု လုံး၀မရှိ၊ ဒီရွေးကောက်ပွဲကို ဘယ်လိုမှ လက်ခံနိုင်မှာမဟုတ်ဘူးဆိုတာ ကျွန်တော်ပြောထားပြီးသားပါ” ဟု ပဒိုစောတောနီးက သုံးသပ်ထားသည်။
ထို့အပြင် စစ်ကောင်စီမှ ရွေးကောက်ပွဲကို မရမက အတင်းအကြပ်ပြုလုပ်ပါက နိုင်ငံရေးနှင့် စစ်ရေးတွင် အရှုပ်အထွေးများ အများကြီးပေါ်ပေါက်လာနိုင်ပြီး နောက်ဆက်တွဲအခြေအနေများအားလုံးကို စစ်ကောင်စီက တာဝန်ခံရမည်ဟု ပဒိုစောတောနီးက ပြောသည်။
“အကြမ်းဖက်စစ်အုပ်စုကနေပြီးတော့ တဇွတ်ထိုး အဲ့ဒီမှာ ရွေးကောက်ပွဲမရမက အတင်းအကြပ်လုပ်လာမယ်ဆိုရင် အဲ့ဒီရွေးကောက်ပွဲကို ပြန်ပြီးတုံ့ပြန်ပုံ တုံ့ပြန်နည်းကတော့ တစ်ဖွဲ့နဲ့တစ်ဖွဲ့တူမှာမဟုတ်ဘူး” ဟု ကေအဲန်ယူ ပြောခွင့်ရသူက ဆိုသည်။
