ရန်ကုန်မြို့ သင်္ဃန်းကျွန်းမြို့နယ် သုဝဏ္ဏတံတား အဆင်းတွင် ယနေ့ (ဖေဖော်ဝါရီ ၄) နေ့လည်ပိုင်းက အိမ်စီးကား မောင်းနှင်လာသည့် အမျိုးသားဓားထိုး လုယက်ခံရမှု ဖြစ်ပွားခဲ့ကြောင်း ဒေသခံများက ပြောသည်။
ယနေ့ နေ့လည် ၁၂ နာရီကျော်တွင် သုဝဏ္ဏတံတားအဆင်း ရွှေအင်ကြင်းအိမ်ရာအနီးတွင် Honda Fit အိမ်စီးကားမောင်းလာသည့် အမျိုးသားတစ်ဦးအား Hijet ယာဥ်ပေါ်မှ အမည်မသိ လူတစ်စုက ဓားဖြင့်ထိုး၍ ပစ္စည်းလုယက်မှု ဖြစ်ပွားခဲ့ကြောင်း သင်္ဃန်းကျွန်းမြို့နယ်နေ ပြည်သူတစ်ဦးက ပြောသည်။
” မီးပွိုင့်မိနေတုန်း Hijet ကားပေါ်ကနေ လူ သုံးယောက်ဆင်းလာပြီး ကားအမဲပေါ်က လူကို ဓားနဲ့ ထိုးပြီး လုတာလို့ သိရတယ်။ ရွှေဆွဲကြိုးတို့ ပိုက်ဆံအိတ်တို့ ပါသွားတယ်ကြားတယ်။ အနားက စျေးသည်တွေက အဌားယာဥ်ခေါ်ပေးပြီး ဓားထိုးခံရသူကိုဆေးရုံပို့ပေးလိုက်ပါတယ် “ဟု ၎င်းက ဆိုသည်။
လုယက်သူများက မီးပွိုင့်လွတ်ချိန်တွင် Hijet ကားဖြင့် ထွက်ပြေးလွတ်မြောက်သွားကြောင်း ဒေသခံအချို့က ပြောသည်။
Public Service Announcement
ဓားထိုးခံရသူ အမျိုးသားသည် သင်္ဃန်းကျွန်း စံပြဆေးရုံတွင် ဆေးကုသမှု ခံယူနေပြီး မိသားစုဝင်များဖြင့်လည်း အဆက်အသွယ် ရရှိပြီ ဖြစ်ကြောင်း သင်္ဃန်းကျွန်းမြို့နယ် ပရဟိတအဖွဲ့က ဆိုသည်။
