စစ်တပ်ရဲ့အာဏာသိမ်းမှုကြောင့် အရှိန်ရနေတဲ့ ငြိမ်းချမ်းရေးလုပ်ငန်းစဉ်နဲ့ နိုင်ငံရေးဆွေးနွေးပွဲတွေ ရပ်ဆိုင်းသွားတယ်လို့အပစ်ရပ်အဖွဲ့တွေ စုဖွဲ့ထားတဲ့ ငြိမ်းချမ်းရေးလုပ်ငန်းစဉ်အဖွဲ့ ဦးဆောင်ကော်မတီက ထုတ်ပြောလိုက်ပါတယ်။
ဒီနေ့မှာကျရောက်တဲ့ ပြည်ထောင်စုနေ့ဆီ ပေးပို့တဲ့သဝဏ်လွှာမှာ စစ်အာဏာသိမ်းကြောင့် ငြိမ်းချမ်းရေးထိခိုက်သွားတာကို ထည့်သွင်းပြောဆိုလိုက်တာပါ။
နိုင်ငံရေးပြဿနာတွေကို နိုင်ငံရေးနည်းလမ်းနဲ့ ဖြေရှင်းတဲ့ နိုင်ငံရေးယဉ်ကျေးမှုကို ပျိုးထောင်ဆဲကာလမှာ စစ်တပ်အာဏာကောက်သိမ်းလို့ ငြိမ်းချမ်းရေးဆွေးနွေးမှုတွေနဲ့ နိုင်ငံရေးဆွေးနွေးပွဲတွေ ” ကံမကောင်းအကြောင်းမလှစွာ” ရပ်ဆိုင်းသွားတယ်လို့ ငြိမ်းချမ်းရေးလုပ်ငန်းစဉ်အဖွဲ့ ဦးဆောင်ကော်မတီက ကဆိုပါတယ်။
ဒါအပြင် အာဏာသိမ်းမှု အကျိုးဆက်အဖြစ် နိုင်ငံတကာရဲ့ အရေးယူပိတ်ဆို့မှုတွေအပါအဝင် အထွေထွေအကြပ်အတည်းတွေဖြစ်ပွားနေတယ်လို့လည်း ပြောပါတယ်။
Public Service Announcement
တိုင်းပြည်ဟာ ပြည်တွင်းစစ် ပုံသဏ္ဍာအသစ်ဆီ ဦးတည်နေပြီး အချိန်ကြာနိုင်တဲ့ နိုင်ငံရေးအကြပ်အတည်း ဝဲသြဃအတွင်း ဆင်းသက်နေတယ်လို့လည်း ထောက်ပြထားတာတွေ့ရပါတယ်။
ငြိမ်းချမ်းရေးလုပ်ငန်းစဉ်အဖွဲ့ ဦးဆောင်ကော်မတီ အနေနဲ့တော့ နိုင်ငံရေးပြဿနာကိုနိုင်ငံရေးနည်းလမ်းနဲ့ဖြေရှင်းမယ့်မူကို ဆက်လက်ကိုင်စွဲထားတယ်လို့သဝဏ်လွှာကတဆင့်အသိပေးထားပါတယ်။
စစ်ကောင်စီခေါင်းဆောင်ကလည်း ၂၀၂၂ ခုနှစ်ကို ငြိမ်းချမ်းရေးနှစ်အဖြစ်သတ်မှတ်ခဲ့ပေမယ့်မအောင်မြင်ခဲ့ဘူးလို့ ဒီနေ့ မှာ ဝန်ခံသွားပါတယ်။
ငြိမ်းချမ်းရေးလုပ်ငန်းစဉ်အဖွဲ့ ဦးဆောင်ကော်မတီ ကို တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးစာချုပ် (NCA)ထိုးထားတဲ့အဖွဲ့တွေ ဖွဲ့ထားပေမယ့် အာဏာသိမ်းပြီးနောက် အဖွဲ့အချို့သာ ပါဝင်ဆွေးနွေးနေတာပါ။
NCA ထိုးထားတဲ့ ကရင်အမျိုးသားအစည်းအရုံး(KNU )၊ ချင်းအမျိုးသားတပ်ဦး (CNF) နဲ့ ကျောင်းသား တပ်မတော်(ABSDF) တို့ဟာ စစ်ကောင်စီနဲ့ တိုက်ပွဲတွေဖြစ်နေပါတယ်။
