စစ်ကောင်စီလေကြောင်း တိုက်ခိုက်မှုအတွင်း မပေါက်ကွဲသေးသည့်ဗုံးဆံနှင့် သေဆုံးခဲ့သည့် ရှားပါးရစ်မျိုးစိတ် ငှက်များ၏ဓာတ်ပုံ CDF ဖော်ပြ

ချင်းပြည်နယ် မင်းတပ်မြို့ကို စစ်ကောင်စီတပ်က ဧပြီ ၁၁ရက်ညပိုင်း လေကြောင်းမှ ဗုံးကြဲတိုက်ခိုက်ခဲ့ရာ မပေါက်ကွဲသေးသည့် ဗုံးဆံအချို့ ကျန်ရှိနေခဲ့ပြီး ယင်းဗုံးဆံများ၏ ဓာတ်ပုံနှင့် ရုပ်သံမှတ်တမ်းကို မင်းတပ် CDFက ယနေ့ ဖော်ပြခဲ့သည်။

အဆိုပါ ဗုံးကြဲတိုက်ခိုက်မှုအတွင်း လူသေဆုံးမှုမရှိသော်လည်း ဘုန်းကြီးကျောင်းနှင့် နေအိမ်အချို့ ထိခိုက်ပျက်စီးခဲ့သည်ဟု ဆိုသည်။

လေယာဉ် ဗုံးကြဲခံရသည့်နေရာများကို ကွင်းဆင်းရှင်းလင်းရာ မပေါက်ကွဲဘဲ ကျန်နေသည့် ဗုံဆံများ၊ ထိခိုက်ပျက်စီးသွားသည့် ရှားပါး ရစ်မျိုးစိတ်ငှက်များ တွေ့ရကြောင်း ဓာတ်ပုံနှင့်တကွ ဖော်ပြသည်။

မပေါက်ကွဲသေးသည့် ဗုံးများ ရှိနေသေး၍ ပြည်သူများ တောထဲ၊ တောင်ယာခင်များ သွားလာရာ၌ သတိထားရန် မင်းတပ်ပြည်သူ့အုပ်ချုပ်ရေးအဖွဲ့မှ ဆလိုင်းယောမာန်က လူမှုကွန်ရက်မှတဆင့်အသိပေးထားသည်။

Public Service Announcement

ထို့ပြင် လက်နက်ကြီး ဗုံးဆံများတွေ့ရှိပါက ထိခြင်း ကိုင်ခြင်းမပြုဘဲ နီးစပ်ရာပြည်သူ့အုပ်ချုပ်ရေးအဖွဲ့နှင့် ကာကွယ်ရေးအဖွဲ့များကို သတင်းပို့ရန် တိုက်တွန်းထားသည်။