ပြည်သူလူထု လေကြောင်းအန္တရာယ်ကင်းရေးအတွက်အစီအမံများတွဲ၍ လုပ်ဆောင်ရန် ရဲဘော်များအား NUG ကာကွယ်ရေးဝန်ကြီး တိုက်တွန်း

တော်လှန်ရေးတပ်များအား လေကြောင်းတိုက်ခိုက်ရာ၌ သက်ရောက်မှုကြီးမားစွာမရှိ၍ ပြည်သူများကို ပစ်မှတ်ထားတိုက်ခိုက်မှု ပိုလုပ် လာဟုပြော

စစ်ကောင်စီအနေဖြင့် ပြည်သူလူထုကို ပစ်မှတ်ထားပြီးလေကြောင်း တိုက်ခိုက်ခြင်းများ ပိုမိုလုပ် ဆောင်လာသောကြောင့် လေကြောင်းအန္တရာယ် ကင်းရေး အစီအမံများဆောင်ရွက်ရာတွင် ပြည်သူလူထုများအတွက်ပါတွဲ၍ ဆောင်ရွက်ရန် အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနပြည်ထောင်စုဝန်ကြီး ဦးရည်မွန်က တိုက်တွန်းလိုက်သည်။

ယမန်နေ့က ကျင်းပသည့် ချင်းအမျိုးသားအဖွဲ့ချုပ်/ချင်းအမျိုးသားကာကွယ်ရေးတပ်ဖွဲ့(CNO/CNDF)မှ ကျင်းပသော (၂)နှစ်ပြည့်ချင်းအမျိုးသားနွေဦးတော်လှန်ရေးနေ့အခမ်းအနား၌ ဝန်ကြီးက အထက်ပါအတိုင်း တိုက်တွန်းလိုက်ခြင်းဖြစ်သည်။

CNDF အနေဖြင့် ပြီးခဲ့သည့်ရက်က ဖလမ်းနယ်ရှိ စစ်ကောင်စီ တပ်စခန်းတစ်ခုကို သမိုင်းဝင်သိမ်းပိုက်နိုင်ခဲ့မှုအပေါ် ဝန်ကြီးက အစိုးရကိုယ်စား ဂုဏ်ယူကြောင်း ပြောကြားခဲ့သည်။ စစ်ကောင်စီအနေဖြင့် အဆိုပါတိုက်ပွဲ၏ နောက်ဆက်တွဲအဖြစ် လူမဆန်စွာပင် အရပ်သားပြည်သူများနေထိုင်သည့် ဝေဘူလမြို့ကို လေကြောင်းတိုက်ခိုက်ခဲ့ကြောင်း ဝန်ကြီးက ပြောသည်။

“အခုအချိန်မှာ ကျနော်တို့ရဲ့ တော်လှန်ရေးရဲဘော် တွေအားလုံး တော်လှန်ရေးအသိ တော်လှန်ရေး သတိကိုတော့ အမြင့်ဆုံးမြှင့်တင်ထားဖို့လိုအပ်တာတဲ့အချိန်လို့ ကျနော့်အနေနဲ့ တိုက်တွန်းလိုပါတယ်။ ဘာကြောင့်လဲ။ မြေပြင်မှာ တော်လှန်ရေးတပ်ဖွဲ့တွေကို အင်အားခြင်းလည်း မယှဉ်နိုင်၊ စစ်ကို စစ်နဲ့တူအောင်လည်း မတိုက်နိုင်တဲ့ အချိန်မှာ စစ်ကောင်စီအနေနဲ့ဆိုလို့ရှိရင် သူ့ရဲ့ လေကြောင်းကို အားပြုပြီး တော်လှန်ရေးရဲဘော်တွေကို လက်စားချေလေ့ရှိတာကို ကျနော် တို့ သတိပြုမိပါတယ်။ ဒီလိုလေကြောင်းနဲ့ လက်စားချေမှုဟာ တော်လှန်ရေးရဲဘော်တွေအပေါ်မှာ သက်ရောက်မှု ကြီးကြီးမားမား မရှိတဲ့အခါမှာတော့ ဒီဘက်ပိုင်းမှာ အပြစ်မဲ့ ပြည်သူတွေရဲ့ ကျေးရွာတွေကို ပစ်မှတ်ထားပြီး တိုက်ခိုက်လာတာတွေ ပိုပြီးများလာတာ ကျနော်တို့ တွေ့ရပါတယ်”ဟု ဝန်ကြီး ဦးရည်မွန်က ပြောသည်။

Public Service Announcement

ဧပြီ ၁၀ရက်က ဖလမ်းနယ် ဝေဘူလမြို့ကို လေကြောင်း တိုက်ခိုက်ခဲ့ပြီး ဧပြီ ၁၁ရက်တွင် စစ်ကိုင်းတိုင်း ကန့်ဘလူမြို့နယ် ပဇီကြီးရွာကို စစ်ကောင်စီက လေကြောင်း တိုက်ခိုက်ခဲ့ရာ ပြည်သူလူထုများစွာ အသက်ဆုံးရှုံးခဲ့ရသည်။

“ဒီအချိန်မှာ တော်လှန်ရေးရဲဘော်တွေအနေနဲ့ ရှေ့မှာ ပြောခဲ့သလိုပဲ ကိုယ့်ပြည်သူကို ကာကွယ်စောင့်ရှောက်ရမယ့် တာဝန်ကလည်း ပိုပိုပြီးတော့ ကြီးလေးလာတယ်လို့ မြင်ပါတယ်။

ရန်သူရဲ့ လေကြောင်း တိုက်ခိုက်မှုကို ကိုယ့်ရဲဘော်တွေ ကိုယ့်တပ်ဖွဲ့တွေ အန္တရာယ်ကင်းအောင် လိုအပ်တဲ့အစီအမံတွေ လုပ်ကြရမှာ ဖြစ်သလို ကိုယ့်ရဲ့ ပြည်သူတွေ လေကြောင်း အန္တရာယ်တွေ ကင်းဝေးအောင်လည်း လိုအပ်တဲ့ အစီအမံတွေ တွဲပြီး ဆောင်ရွက်ကြဖို့လိုအပ်လိမ့်မယ်လို့ ကျနော့်အနေနဲ့ တိုက်တွန်းလိုပါတယ်”ဟု ပြည်ထောင်စုဝန်ကြီးက ပြောသည်။

ပြည်သူလူထုများကို အသိပညာပေးခြင်း၊ ရှေ့ဆောင်လမ်းပြ ဆောင်ရွက်ပေးခြင်းဖြင့် လေကြောင်းအန္တရာယ် ကာကွယ်နိုင်ရေး ဆောင်ရွက်ရန် ၎င်းက ဆိုသည်။