စစ်ကောင်စီလက်အောက်ခံ ပျူစောထီးအဖွဲ့ဝင်များစုဝေးနေသည့် မွန်ပြည်နယ်၊ ပေါင်မြို့နယ်၊ သဗြုချောင်ကျေးရွာရှိ ပြည်သူ့စစ်ခေါင်းဆောင်၏ နေအိမ်တစ်အိမ်အား MON – S.O.F ရဲဘော်များက ၀င်ရောင်စီးနင်းတိုက်ခိုက်ခဲ့ကြောင်း အထူးစစ်ဆင်ရေးတပ်ဖွဲ့ S.O.F မှ တာ၀န်ရှိသူတစ်ဦးက ပြောသည်။
အဆိုပါစီးနင်းမှုကို မေလ ၁ ရက် နံနက် ၄ နာရီခွဲတွင် ‘နန်းထိုက်အောင်စစ်ဆင်ရေး’အဖြစ် လုပ်ဆောင်ခဲ့ခြင်းဖြစ်ပြီး တိုက်ခိုက်မှုအတွင်း အပြန်အလှန်ပစ်ခတ်မှုဖြစ်ပွားကာ ပြည်သူ့စစ်ခေါင်းဆောင် ဦးဖိုးချစ်ဆိုသူနှင့် အဖွဲ့ဝင်များ ဒဏ်ရာများနှင့် ထွက်ပြေးလွတ်မြောက်သွားခဲ့သည်ဟု ဆိုသည်။
ထို့နောက် ၎င်း၏နေအိမ်အား ဆက်လက်ရှာဖွေရာ M16 အမျိုးအစား သေနတ် တစ်လက်၊ M1 အမျိုးအစားရိုင်ဖယ် တစ်လက်၊ ကျည်ဘောက် ၂ ခု၊ ကျည် ၂၀၀ တောင့်၊ ဖုန်း နှစ်လုံး သိမ်းဆည်းရမိခဲ့ကြောင်း S.O.F က အသိပေးသည်။
“ပြည်သူ့စစ်တွေစခန်းချတဲ့နေရာလို့တော့ ကျနော်တို့ မသတ်မှတ်ဘူး။ ဒါပေမဲ့ အဲဒီမှာ သူတို့ လူစုတယ်။ ညဘက်ကြရင်လည်း သူတို့သုံးယောက်လေးရောက် လုံခြုံရေးချထားတယ်လို့ ကျနော်တို့ သတင်းရတာပေါ့။ ပြီးတော့ အဲဒီအိမ်မှာ ညဘက်လူစုပြီး သောက်တယ်စားတယ်၊ ဖဲရိုက်တယ်လို့ သတင်းရထားတာပေါ့။ အဲဒီအိမ်က သဗြုချောင်ရွာသား ပြည်သူ့စစ်ခေါင်းဆောင်ရဲ့နေအိမ်။ သူက ရငြိမ်းနယ်ဘက်က ပြည်သူ့စစ်တွေအားလုံးရဲ့ခေါင်းဆောင်ပါ”ဟု ၀င်ရောက်စီးနင်းခဲ့သည့်နေအိမ်နှင့်စပ်လျဉ်းပြီး S.O.F မှ တာ၀န်ရှိသူတစ်ဦးက People’s Spring သို့ ပြောသည်။
Public Service Announcement
ထို့အပြင် အဆိုပါပြည်သူ့စစ်ခေါင်းဆောင်ဆိုသူသည် ပေါင်မြို့နယ်အတွင်း CDM ပြုလုပ်သူများနှင့် အပြစ်မဲ့လူ ငယ်များအား ဖမ်းဆီးခြင်း၊ မတရားနှိပ်စက်ခြင်း၊ ခြိမ်းခြောက်ငွေကြေးတောင်းခံခြင်းနှင့် တရားမဝင်လောင်းကစားလုပ်ငန်းမျိုးစုံကို စစ်ကောင်စီနှင့်ပူးပေါင်းဆောင်ရွက်နေသောကြောင့် ယခုကဲ့သို့ စီးနင်းတိုက်ခိုက်ခဲ့ခြင်းဖြစ်ကြောင်း S.O.F က အသိပေးထားသည်။
