ဟင်္သာတနှင့်ဇလွန်မြို့တို့ရှိ NLDရုံးကို စစ်အုပ်စု ဖျက်ဆီး

ဧရာဝတီတိုင်းအတွင်း ဟင်္သာတနှင့်ဇလွန်မြို့တို့ရှိ အမျိုးသားဒီမိုကရေစီအဖွဲ့ချုပ်ပါတီ (NLD)ရုံးကို စစ်ကောင်စီတပ်ဖွဲ့ဝင်များနှင့် ဌာနဆိုင်ရာဝန်ထမ်းများက ဖျက်ဆီးသွားကြောင်း သတင်းရရှိသည်။

ဟင်္သာတမြို့ NLDပါတီရုံးကို မေလ ၄ရက်တွင် ဖျက်ဆီးပြီး ဇလွန်မြို့NLDပါတီ ရုံးကို မေလ ၅ရက်တွင် ဝင်ရောက်ဖျက်ဆီးခြင်းဟု မြို့ခံအချို့က ပြောသည်။

“ဇလွန်ရုံးရော ဟင်္သာတရုံးကိုပါ ဖျက်ဆီးသွားတာ။ ဆိုင်းဘုတ်တွေ ဖြုတ်ချသွားတယ်။ လာသွားတဲ့ကောင်တွေကို ကျွန်တော်တို့ မှတ်မိတယ်”ဟု ဟင်္သာတ မြို့ခံတစ်ဦးက ပြောသည်။

လာ‌ရောက်ဖျက်ဆီးရာတွင် စစ်ကောင်စီတပ်ဖွဲ့နှင့် အတူ ထွေအုပ်ဝန်ထမ်းများ၊ ရဲနှင့် မီးသတ်တပ်ဖွဲ့ဝင်များလည်းပါဝင်သည်ဟု သတင်းရရှိသည်။

Public Service Announcement

စစ်ကောင်စီသည် အမျိုးသားဒီမိုကရေစီအဖွဲ့ချုပ် အပါအဝင် နိုင်ငံ‌ရေးပါတီ (၄၀)အားဖျက်သိမ်းကြောင်း မတ်လ ၂၈ ရက်တွင် ကြေညာပြီး‌နောက် မြို့နယ်အချို့ရှိ NLDပါတီ ရုံးအချို့ကို ဖျက်ဆီးမှုများ ပြုလုပ်ခဲ့သည်။ပြီးခဲ့သည့် ဧပြီရ၇ရက်က မန္တလေးတိုင်း၊ တောင်သာမြို့နယ် အမျိုးသားဒီမိုကရေစီအဖွဲ့ချုပ်ပါတီ(NLD)ရုံး ဖျက်ဆီးခဲ့ပြီး ဧပြီ ၂၅ ရက်တွင် ပဲခူးတိုင်း သာယာဝတီခရိုင် NLD ပါတီရုံး ဖျက်ဆီးခဲ့သည်။