▪︎စစ်ရှောင်ကူညီရန် PNLO ထံလာသည့် အာဆီယံသံတမန်များ ထိခိုက်မှုမရှိသော်လည်း ဒေသခံများနှင့် တွေ့ဆုံပွဲ ပျက်သွား
▪︎“နိုင်ငံတကာ သံတမန်နဲ့ စစ်ဘေးရှောင် စကားပြောလိုက်ရရင် စကစရဲ့လုပ်ရပ်တွေက ပိုပေါ်ကုန်မှာကို ကြောက်လို့ဖြစ်မယ်” -ဒေသခံတစ်ဦး
▪︎”ကရင်နီပြည်မှာ Save The Children ဝန်ထမ်းတွေကို မီးရှိ့သတ်ခဲ့တာ စစ်ကောင်စီတပ်ဖွဲ့ဝင်တွေဖြစ်တယ်ဆိုတာ ပြန်သတိရစေချင်ပါတယ်”-NUG တာဝန်ရှိသူ
ရှမ်းပြည်နယ်တောင်ပိုင်း ဆီဆိုင်မြို့နယ်ရှိပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO) ဆက်ဆံရေးရုံးသို့ လာရောက်သည့် အင်ဒိုနီးရှား၊ စင်္ကာပူ သံတမန်များ၊ အာဆီယံလူသားချင်းစာနာမှုဆိုင်ရာအကူအညီပေးရေးစင်တာ(AHA)မှတာဝန်ရှိသူများလိုက်ပါလာသည့်ယာဉ်တန်းယမန်နေ့ မေလ ၇ရက် က တိုက်ခိုက်ခံခဲ့ရကြောင်း ဒေသတွင်း သတင်းရင်းမြစ်က ပြောသည်။
အင်ဒိုနီးရှား၊ စင်္ကာပူ သံတမန်များ၊ အာဆီယံလူသားချင်းစာနာမှုဆိုင်ရာအကူအညီပေးရေးစင်တာ(AHA) စင်တာမှတာဝန်ရှိသူများ ပါသည့် ယာဉ်တန်းသည်တောင်ကြီးမြို့မှဆီဆိုင်မြို့သို့ လာရောက်စဉ် ဆီဆိုင်မြို့နယ် နန်းဩရွာ မြောက်ဘက် သရက်ပင်ကြီးအကွေ့အရောက်၌ ပစ်ခတ်ခံရခြင်းဖြစ်သည်။ ပစ်ခတ်မှု ဖြစ်စဉ်ဖြစ်ပွားသည့် နေရာသည် စစ်ကောင်စီနှင့် စစ်ကောင်စီလက်အောက်ခံ PNO ပြည်သူ့စစ် တပ်စခန်း နှစ်ခုအကြားတွင်ရှိသည်။ ဆီဆိုင်မြို့နယ်ရှိ စစ်ကောင်စီ၏ ခမရ(၄၂၃)နှင့် ခမရ(၄၂၄) တပ်ရင်းများနှင့် ၁၁ မိုင်ကျော်သာ ကွာဝေးကြောင်း၊ စစ်ကောင်စီလက်အောက်ခံ PNO ပြည်သူ့စစ် အောင်ဆုဗွေစခန်းနှင့် ၁၁ မိုင်သာကွာဝေးကြောင်း ဒေသခံအချို့ကပြောသည်။
“အဓိကကတော့ ပစ္စည်း(စစ်ရှောင်ကူညီရေးပစ္စည်း)သွားပေးတာပါ။ သွားပေးတော့ တိုက်ခိုက်ခံရတာပေါ့။ ထိခိုက်တာတော့မရှိဘူး”ဟု သတင်းရင်းမြစ်က ပြောသည်။ အဆိုပါ ယာဉ်တန်း၌ အင်ဒိုနီးရှားနှင့် စင်္ကာပူမှ သံတမန်များပါဝင်သည်ဟုသိရသည်။
အဆိုပါ တိုက်ခိုက်ခံရမှုနှင့်ပတ်သက်ပြီး စစ်ကောင်စီဝါဒဖြန့် ချန်နယ်များက PDFများ လုပ်ဆောင်ခြင်းဖြစ်သည်ဟု စွပ်စွဲမှုရှိသော်လည်း ဒေသတွင်း သတင်းရင်းမြစ်နှင့် အမျိုးသားညီညွတ်ရေးအစိုးရအဖွဲ့တာဝန်ရှိသူက PDFများ လက်ချက်မဟုတ်ဟု ရှင်းလင်းပြောကြားသည်။
Public Service Announcement
သံတမန်ယာဉ်တန်း တိုက်ခိုက်ခံရမှုနှင့်ပတ်သက်ပြီး အမျိုးသားညီညွတ်ရေးအစိုးရ တာဝန်ရှိသူတစ်ဦးက “ နိုင်ငံတကာ Diplomat တွေ၊ လူသားချင်းစာနာမှုအကူအညီပေးသူတွေကို ပစ်မှတ်ထားတိုက်ခိုက်တာမျိုး PDF တွေ လုံးဝမလုပ်ပါဘူး။ ကရင်နီပြည်မှာ Save The Children ဝန်ထမ်းတွေကို မီးရှိ့သတ်ခဲ့တာ စစ်ကောင်စီတပ်ဖွဲ့ဝင်တွေဖြစ်တယ်ဆိုတာ ပြန်သတိရစေချင်ပါတယ်” ဟု People’s Spring သို့ ပြောကြားသည်။
စစ်ကောင်စီတပ်သည် ၂၀၂၁ ဒီဇင်ဘာလက ဖရူဆိုမြို့နယ် မိုဆိုရွာတွင် Save The Children ဝန်ထမ်းများနှင့် ပြည်သူများအပါအဝင် လူဦးရေ ၃၀ကျော်ကို အစုလိုက်အပြုံလိုက် မီးရှို့သတ်ဖြတ်မှု ကျူးလွန်ခဲ့ဖူးသည်။
“သူတို့(PDF)တော့ မဖြစ်နိုင်ဘူး။ ဒါကျနော်တို့တွေးမိတာပေါ့။ သူတို့ အဲဒီနေရာရောက်ဖို့မလွယ်ဘူး။ အဲဒီမှာ တပ်ရင်း (စစ်ကောင်စီတပ်ရင်း) ၂ရင်း တောင်ရှိတယ်။ သိပ်မဝေးဘူး” ဟု ဒေသခံတစ်ဦးကလည်းပြောသည်။
ပအိုဝ်းဒေသခံတစ်ဦးကလည်းသံတမန်ယာဉ်တန်းတိုက်ခိုက်မှုမှာ စစ်ကောင်စီနှင့် PNO ပြည်သူ့စစ်က လုပ်ဆောင်ခြင်းဖြစ်နိုင်သည်ဟု သုံးသပ်သည်။
“ နိုင်ငံခြားသံတမန်နဲ့ စစ်ဘေးရှောင်တွေကို မတွေ့စေချင်လို့။ နောက်တစ်ခုက PNLO နယ်ရုံးကို နိုင်ငံခြားသံတမန်တွေလာတွေ့တယ်ဆိုတာ နိုင်ငံရေးအဆင့်အရ မြင့်တယ်။ အဲဒါကို PNO(စစ်ကောင်စီလက်အောက်ခံ ပြည်သူ့စစ်)နဲ့ စကစ က အဖြစ်မခံနိုင်လို့။ အဓိကက နိုင်ငံတကာ သံတမန်နဲ့ စစ်ဘေးရှောင် စကားပြောလိုက်ရရင် စကစရဲ့ လုပ်ရပ်တွေက ပိုပေါ်ကုန်မှာ ကြောက်လို့ဖြစ်မယ်”ဟု ပအိုဝ်းဒေသခံတစ်ဦးကသုံးသပ်ပြောကြားသည်။
ယာဉ်တန်းတိုက်ခိုက်ခံရမှုတွင် နောက်ဆုံးယာဉ် အပစ်ခံရခြင်းဖြစ်ကြောင်း၊ အဆိုပါ ဒေသတွင် စစ်ကောင်စီနှင့် PNO သာအဓိကရှိပြီး ကရင်နီနယ်စပ်နှင့် မိုင် ၆၀ ခန့်ဝေးကြောင်း သတင်းရင်းမြစ်က ပြောသည်။
ထိုယာဉ်တန်းတွင်သံတမန်ယာဉ် ၃ စီး၊ ထွေအုပ်ယာဉ် ၃ စီးနှင့် စစ်ကောင်စီတပ်သားယာဉ် တစ်စီးတို့ဖြစ်ပြီး ပစ်ခတ်တိုက်ခိုက်ခံရပြီးနောကမ စစ်ကောင်စီဘက်ကလည်းပြန်လည် ပစ်ခတ်ခဲ့သည်ဟုဆိုသည်။ထိုပစ်ခတ်မှုကြောင့် သံရုံးအရာရှိ ယာဉ်တန်းသည် ဆီဆိုင်သို့ဆက်မသွားတော့ ဘဲနံနက် ၁၀ နာရီကျော်တွင် တောင်ကြီးမြို့ကို ပြန်လည်မောင်းသွားသည်ဟု စစ်ကောင်စီကထုတ်ပြန်ထားသည်။
သို့သော်ဒေသခံများက သံတမန်ကားတန်း၏ နောက်ဆုံးကားတစ်စီးကိုသာသေနတ် ၅ချက်ဝန်းကျင်ထိမှန်သည်ဟုသိရကြောင်းပြောသည်။ ပစ်ခတ်ခံရသောနေရာသည် ဆီဆိုင်မြို့နှင့် ၅ မိုင်သာဝေးပြီး ယာဥ်တန်းမှာ မြို့ရောက်ခါနီးမှ တောင်ကြီးသို့ပြန်သွားခြင်းဖြစ်သည်ဟုဒေသခံများကပြောသည်။
ဆီဆိုင်ရှိစစ်ဘေးဒုက္ခသည်စခန်းများတွင် စစ်ဘေးရှောင်ပြည်သူ သောင်းဂဏန်းရှိပြီး ကရင်နီ၊ပအိုဝ်း၊ ဗမာစသောစစ်ဘေးရှောင်များရှိပြီး အများဆုံးမှာကရင်နီစစ်ဘေးရှောင်များဖြစ်ကြောင်းဒေသခံများကပြောသည်။
AHA စင်တာက အာဆီယံဥက္ကဌ အင်ဒိုနီးရှာဦးဆောင်၍ NUG ၊ တိုင်းရင်းသားလက်နက်ကိုင်အဖွဲ့များ၊စစ်ဘေးရှောင်ကူညီပေးသောအရပ်ဖက်အဖွဲ့အစည်းအချို့ ၊စစ်ကောင်စီအပါအဝင် သက်ဆိုင်သူများနှင့်အကြိမ်ကြိမ်တွေ့ဆုံဆွေးနွေး၍ စစ်ဘေးရှောင်များကို စတင်ကူညီနိုင်ရန် စီစဥ်နေခြင်းဖြစ်ကြောင်းသံတမန်တချို့ကပြောသည်။
အဆိုပါ သံတမန်ယာဉ်တန်း တိုက်ခိုက်ခံရမှုနှင့်ပတ်သက်၍ ပအိုဝ်းတော်လှန်ရေးတပ်ဖွဲ့ PNLO ထံသို့ ဆက်သွယ်ရာ လတ်တလော မှတ်ချက်ပေးရန်မရှိသေးဟု ပြောသည်။
