စစ်ကိုင်းတိုင်း၊ ခင်ဦးမြို့နယ်တွင် ကျပ်သိန်း၄၀၀ ကျော်တန်ဖိုးရှိ စစ်ကောင်စီ၏ထုတ်ကုန် အရက်၊ဘီယာများ စစ်ဆေးတွေ့ရှိ၍ ဖျက်ဆီးခဲ့ကြောင်း ခင်ဦးမြို့နယ်ပြည်သူ့အုပ်ချုပ်ရေးအဖွဲ့က ပြောသည်။
ယမန်နေ့က ခင်ဦးမြို့နယ်ပြည်သူ့အုပ်ချုပ်ရေးအဖွဲ့(မြို့နယ် ပအဖ)၏ လမ်းညွှန်မှုဖြင့် မြို့နယ် (ပကဖ)နှင့် ဒေသခံကာကွယ်ရေးအဖွဲ့များက Dagonအမှတ်တံဆိပ်အရက်၊ဘီယာများ သယ် ဆောင်လာသည့် ယာဉ်သုံးစီးကို စစ်ဆေးတွေ့ရှိခဲ့ခြင်းဟု ဆိုသည်။
အဆိုပါ ယာဉ်များပေါ်တွင် ကာလတန်ဖိုး ကျပ်သိန်းလေးရာကျော်ရှိသော စစ်ကောင်စီထုတ် ဘီယာ ဂျပ်ဖာပေါင်း ၅၄၀ ဖာ၊ ဗူးပေါင်း ၁၁,၀၄၀ ဗူးနှင့် ပုလင်းပေါင်း ၇၈၀ ပါရှိကြောင်း အသိပေးသည်။
သိမ်းဆည်းရမိသော ပစ္စည်းများအားလုံးကို တော်လှန်ရေးအင်အားစုများမှ အများပြည်သူ များ၏ ရှေ့မှောက်တွင် မှတ်တမ်းများနှင့်တကွ ဖျက်ဆီးခဲ့သည်ဟု ဆိုသည်။
Public Service Announcement
“စစ်ကောင်စီ ထုတ်ကုန်နဲ့ပတ်သက်လို့ကတော့ မသုံးဖို့ နဲ့ ရောင်းချတာမလုပ်ဖို့ အကြိမ်ကြိမ် သတိပေးထားပြီး သားပါ။အခုက ခင်ဦးလမ်းပိုင်းမှာ စစ်ဆေးရင်းမိတာ”ဟု ခင်ဦးမြို့နယ်(ပအဖ) တာဝန်ရှိသူက လူထုနွေဦးသို့ ပြောသည်။
စစ်ကောင်စီနှင့် မိသားစုများ၊ ၎င်းတို့နှင့် အကျိုးတူ စီးပွားဘက်များ၏ ထုတ်ကုန်ပစ္စည်းများမှ အမြတ်အစွန်း၊ ငွေကြေးများသည် ပြည်သူလူထုနှင့် တော်လှန်ရေးအင်အားစုများ၏ အသက်၊ အိုးအိမ်၊ စည်းစိမ်များကို ဆိုးရွာစွာဖျက်ဆီးနေသည့် လုပ်ရပ်များ ဖြစ်သည့်အတွက် စစ်ကောင်စီ ထုတ်ကုန် ပစ္စည်းများကို သပိတ်မှောက်ကြရန် ခင်ဦးမြို့နယ် ပြည်သူ့အုပ်ချုပ်ရေးအဖွဲ့က တိုက်တွန်းသည်။
