ကချင်ပြည်နယ် ဝိုင်းမော်မြို့နယ် နန်ဆန်ယာန်ရွာအနီးရှိ နန်ဆန်ယာန်ချောင်းတွင် ယမန်နေ့ မွန်းလွဲပိုင်းက ကချင်လွတ်လပ်ရေးတပ်မတော်(KIA)နှင့် စစ်ကောင်စီတပ်တို့ တိုက်ပွဲဖြစ်ပွားခဲ့သည်ဟု နန်ဆန်ယာန်ရွာ ဒေသခံတစ်ဦးက ပြောသည်။
စစ်ကောင်စီတပ်က စစ်ရေးလှုပ်ရှားလာ၍ ဇွန်လ ၁၆ရက် နေ့လယ် ၃နာရီခန့်က တိုက်ပွဲဖြစ်ခဲ့ပြီး စစ်ကောင်စီတပ်က ထိခိုက်မှုရှိခဲ့သည်ဟုဆိုသည်။
“ကျနော်တို့ဘက်က စပစ်တာ။ သူကလည်း လောလောဆယ် အင်အားပြချင်တာနဲ့ ဒီဘက်ကနေနည်းနည်းလေး ဆော်ပေးလိုက်တာ။ အခြေအနေကသူတို့အင်အားနဲ့ တက်လာခဲ့လို့ ဖြစ်တာ။ အခြားအကြောင်းမရှိပါဘူး။အခု ဖြစ်တာက နန်ဆန်ယန်ချောင်းနားမှာပဲ”ဟု ဒေသခံက ပြောသည်။
အဆိုပါတိုက်ပွဲ၌ KIA ဘက်က ထိခိုက်မှုမရှိဟု ဒေသခံက ပြောသည်။
Public Service Announcement
“ခဲယမ်းလက်နက်တွေ သိမ်းဆည်းရတာရယ် (စစ်ကောင်စီ)အထိအခိုက်နည်းနည်းရှိတာရယ်ပဲ။ ကျနော်တို့ဘက်က အထိအခိုက်မရှိဘူး။ ကျနော်တို့ဘက်က ကြိုတင်ပြင်ဆင်ထားတယ်ဆိုတော့လေ”ဟု နန်ဆန်ယာန်ဒေသခံက ပြောသည်။
ဝိုင်းမော်မြို့နယ် နေပြည်သူတစ်ဦးကလည်း တိုက်ပွဲဖြစ်ပွားမှုကို မကြားရသေးသော်လည်း အဆိုပါဒေသ၌ တိုက်ပွဲငယ်များ ဖြစ်ပွားမှုရှိနိုင်သည်ဟုပြောသည်။
“နန်ဆန်ယာန်နဲ့ ဝိုင်းမော်ကတော့ ကားနဲ့သွားမယ်ဆိုရင် တစ်နာရီ ကျော်ကျော်လောက်တော့ မောင်းတာပေါ့။ နည်းနည်းပါးပါး ဖြစ်တာထင်တယ်။ တခါတလေတော့ နည်းနည်းပါးပါးတော့ ဖြစ်ကြတယ်။ ဟိုဘက်က (KIA)နဲ့ ဒီဘက်က ဗမာအစိုးရစစ်တပ်(စစ်ကောင်စီတပ်)နဲ့ နီးတယ်ဆိုတော့ ဖြစ်လည်းဖြစ်နိုင်ပါတယ်”ဟု ဝိုင်းမော်ဒေသခံက ပြောသည်။
တိုက်ပွဲဖြစ်ပွားမှုနှင့်ပတ်သက်ပြီး KIA သတင်းနှင့် ပြန်ကြားရေးဌာန တာဝန်ခံဗိုလ်မှူးကြီးနော်ဘူထံသို့ဆက်သွယ်မေးမြန်းထားဆဲဖြစ်သည်။
KIA နှင့် စစ်ကောင်စီတပ်တို့သည် ယခုလအတွင်းရှမ်းပြည်နယ် မြောက်ပိုင်း ကွတ်ခိုင်မြို့နယ်အတွင်း တိုက်ပွဲဖြစ်ပွားမှုများ ရှိခဲ့သည်။
