စစ်ကိုင်းတိုင်း၊ မြောင်မြို့နယ်အခြေစိုက် စစ်ကိုင်းခရိုင်တပ်ရင်းအမှတ်(၄) MSPDFအဖွဲ့ခေါင်းဆောင်နှင့်သားဖြစ်သူအပါအဝင် ရဲဘော်လေးဦးကျဆုံးခဲ့သည့်ဖြစ်စဥ်တွင် စစ်ကောင်စီဘက်က နှစ်ဦးသေဆုံးပြီး သုံးဦးဒဏ်ရာရရှိခဲ့ကြောင်း MSPDFအဖွဲ့၏ သတင်းနှင့် ပြန်ကြားရေးတာဝန်ခံက ပြောသည်။
ပြီးခဲ့သည့် ဇွန်လ ၂၆ ရက် နံနက် ၅နာရီခန့်က မြောင်မြို့နယ်၊ ကျောက်ရစ်ရဲစခန်းမှ ထွက်လာသော စစ်ကောင်စီတပ်သည် ပရိမ္မကျေးရွာသို့တိတ်တဆိတ် စစ်ကြောင်းထိုး ၀င်ရောက်ခဲ့သည်။
ထို့နောက် MSPDF အဖွဲ့ခေါင်းဆောင် (၄၇)နှစ်အရွယ် ဗိုလ်စာကလေးခေါ်(ဆရာသက်ခိုင်)အား ဒလန်သတင်းပေးမှုကြောင့် ဖမ်းဆီးခေါ်ဆောင် သွားခဲ့ကြောင်း MSPDFအဖွဲ့၏ သတင်းနှင့် ပြန်ကြားရေးတာဝန်ခံက ပြောသည်။
အဆိုပါ စစ်ကောင်စီတပ်သည် ပရိမ္မကျေးရွာမှ ကျောက်ရစ်စခန်းသို့အပြန်လမ်းတွင် ပြန်လည်ကယ်ထုတ်နိုင်ရန် တော်လှန်ရေးအင်အားစုများက လက်နက်ကြီး ၊ လက်နက််ငယ်များ မိုင်းပွိုင့်များဖြင့် တိုက်ခိုက်ခဲ့သည်။
Public Service Announcement
ထိုသို့တိုက်ခိုက်မှုအတွင်း စစ်ကောင်စီဘက်က နှစ်ဦးသေပြီး သုံးဦးဒဏ်ရာအပြင်းအထန်ရရှိခဲ့ကြောင်း အထက်ပါတာဝန်ခံက ဆိုသည်။
စစ်ကောင်စီတပ်က လက်နက်ကြီးများ ဆက်တိုက်ပစ်ခတ်ခဲ့၍ MSPDFအဖွဲ့ခေါင်းဆောင်၏ သားဖြစ်သူ အသက်(၂၀)အရွယ် ရဲဘော်အပါအဝင် ရဲဘော် သုံးဦးကျဆုံးခဲ့ရပြီး လေးဦးဒဏ်ရာရရှိခဲ့သည်။
ကျဆုံးခဲ့သည့် ရဲဘော်တစ်ဦးမှာ မိတ္ထီလာခရိုင်တပ်ရင်း-၂ မှဖြစ်ကြောင်း ဆိုသည်။
“အဖေအဖမ်းခံရတော့ လိုက်ကယ်ရင်း သားပါကျသွားခဲ့တာပါ။ ရဲဘော်တစ်ဦးကိုတော့ စကစဘက်က လက်နက်ကြီးနဲ့ တအားထုနေတော့ ရုပ်အလောင်း ကောက်မရနိုင်ခဲ့ပါဘူး။ စကစဘက်က မီးရှို့သွားတယ်။”ဟု အထက်ပါတာဝန်ခံက ပြောသည်။
ဖမ်းဆီးခံရသော ဆရာသက်ခိုင်ကိုလည်း စစ်ကောင်စီတပ်က လမ်းတစ်နေရာတွင် သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ထို့အပြင် ဒဏ်ရာရ ရဲဘော်များ၏ အခြေအနေနှင့်ပတ်သက်၍ “ရဲဘော်တစ်ဦးက လက်ဖြတ်ရမယ့်အခြေနေပါ။ လက်နက်ကြီးထိတာ။တစ်ခြားရဲဘော်တွေကလည်းအစုံပေါ့ ခြေထောက်တွေ ၊ခေါင်းတွေ၊တွေခါးတွေ အနည်းငယ်ပေါ့။ အသက်အန္တရာယ်တော့ မရှိဘူး”ဟု အထက်ပါတာဝန်ခံက ပြောသည်။
အဆိုပါ တိုက်ခိုက်မှုကို စစ်ကိုင်းခရိုင်တပ်ရင်းအမှတ်(၄) နှင့် မိတ္ထီလာခရိုင်တပ်ရင်းအမှတ် – (၂) မြင်းခြံခရိုင်တပ်ရင်း -(၈)တို့က ပူးပေါင်းတိုက်ခိုက်ခဲ့ခြင်းဖြစ်သည်။
MSPDF အဖွဲ့သည် မြောင်မြို့နယ်အတွင်း အခြေစိုက်ပြီး တော်လှန်ရေးကာလအစပိုင်းကတည်းက စစ်ကောင်စီတပ်အား လက်နက်ကိုင်တော်လှန်ခဲ့သည့် အဖွဲ့တစ်ဖွဲ့ဖြစ်သည်။
ကျောက်ရစ်စခန်းမှ စစ်ကောင်စီတပ်သားများသည် မြောင်မြို့နယ်အတွင်း မကြာခဏရွာစဥ်လှည့် မွှေနှောက်ဖျက်ဆီးလေ့ရှိပြီး ဒေသတွင်းတော်လှန်ရေးအင်အားစုများနှင့် ထိတွေ့ပစ်ခတ်မှုများ ဖြစ်ပွားလေ့ရှိသည်။
