ပြည်ပပို့ကုန်တင်ပို့ရာမှ ရရှိလာသည့် နိုင်ငံခြားငွေများကို ပြည်တွင်းဘဏ်များသို့ တစ်ဒေါ်လာ၂၁၀၀ ကျပ်ဖြင့် တရက်အတွင်း ၅၀ ရာခိုင်နှုန်းအား မဖြစ်မနေရောင်းချရမည်ဟု စစ်ကောင်စီဗဟိုဘဏ်က ဇူလိုင် ၁၃ ရက်က ပြင်ဆင်သတ်မှတ်လိုက်သည်။
စစ်ကောင်စီက ၂၀၂၂ ဩဂုတ် ၁၆ ရက်စတင်ပြီး ပို့ကုန်ရငွေ၏ ၆၅ ရာခိုင်နှုန်းကို ပြည်တွင်းဘဏ်များသို့ တစ်ရက်အတွင်းရောင်းချရန်သတ်မှတ်ထားပြီး ကျန် ၃၅ ရာခိုင်နှုန်းကို တစ်လအတွင်း လုပ်ငန်းရှင်များကို အပြည့်အဝသုံးခိုင်း ခဲ့ခြင်းဖြစ်သည်။ ယခုအခါ ၅၀ ရာခိုင်နှုန်းစီသို့ ပြောင်းလဲ ပြင်ဆင်လိုက်ခြင်းဖြစ်သည်။
နိုင်ငံခြားငွေလိုအပ်ချက်ကြီးမားလာသည့် စစ်ကောင်စီကယခုညွန်ကြားချက်မှာ ပို့ကုန်လုပ်ငန်းရှင်များကိုအနည်းငယ် ဖြည့်လျော့ပေးသည်ဟုဆိုသော်လည်း အမှန်တကယ်လက်တွေ့တွင် သက်ရောက်မှုရှိမည်မဟုတ်ကြောင်း ပို့ကုန်လုပ်ငန်းရှင်များကပြောသည်။
“၅၀-၅၀ဆိုလည်း သိပ်ပြီးအလုပ်ဖြစ်ဦးမှာ မဟုတ်ဘူး။ သူတို့ (စစ်ကောင်စီ) ကိုယ်တိုင်က ဒေါ်လာလိုအပ်နေတာအပြင် ဈေးကွက်ထဲမှာရှိတဲ့ဒေါ်လာပမာဏ အနည်းအငယ်ပဲ လည်ပတ်နေရတာ”ဟု ပို့ကုန်လုပ်ငန်းရှင်တစ်ဦးပြောသည်။
Public Service Announcement
စစ်ကောင်စီကဒေါ်လာလိုအပ်ချက်ကြီးမားလာသောကြောင့် ပို့ကုန်လုပ်ငန်းမှ ရငွေများကို ပြည်တွင်းကို ပြန်ဝင်စေရန် ဆွဲဆောင်ခြင်းဖြစ်သည်ဟုလည်း ၎င်းကသုံးသပ်သည်။
“စစ်ကောင်စီအမြင်ကတော့ ဖြေလျော့ပေးတယ်ပေါ့။ ဒါပေမယ်လည်း လိုငွေပြလာတော့ လျော့ရတာပါ။ဒါပေ့မယ်လည်း အလုပ်ဖြစ်မှာမဟုတ်ဘူး”ဟု စီးပွားရေးလုပ်ငန်းရှင်တစ်ဦးကမှတ်ချက်ပေးသည်။
စစ်ကောင်စီကလုပ်ငန်းရှင်များ၏ ပို့ကုန်ရငွေများကိုတစ်ဒေါ်လာ၂၁၀၀ ကျပ်ဖြင့် အတင်းအကျပ်ရောင်းဝယ်ခိုင်းသော်လည်း ပြင်ပပေါက်ဈေးတွင် တစ်ဒေါ်လာကို ၃၁၀၀ ကျပ်ဝန်းကျင်ရှိနေသည်။
