စစ်ကိုင်းတိုင်း ပုလဲမြို့နယ်အတွင်း ဝင်ရောက်လာသည့်အာ စစ်ကောင်စီယာဉ်တန်းနှင့် စစ်ကြောင်းကို ယနေ့ မနက်က နှစ်ကြိမ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၂၅ဦးထက်မနည်းသေဆုံးခဲ့သည်ဟု ပုလဲမြို့နယ် ပြည်သူ့ကာကွယ်ရေးတပ်ဖွဲ့(PDF)က သတင်းထုတ်ပြန်ထားသည်။
အောက်တိုဘာ ၃ရက်တွင် ပုလဲမြို့နယ်အတွင်း ရောက်ရှိလာသော အမြှောက်ကား ၂စီးပါသည့် စစ်ကောင်စီ ယာဉ်တန်းနှင့် စစ်ကြောင်းအား နံနက် ၈နာရီ အချိန်ခန့်မှစ၍ ဆီးကြိုုတိုက်ခိုက်ခဲ့ခြင်းဖြစ်သည်ဟုဆိုသည်။ မည်သည့်နေရာတွင် တိုက်ခိုက်သည်ဆိုသည်ကိုမူ အသေးစိတ်ဖော်ပြမထားသေးပေ။
အဆိုပါဖြစ်စဉ်အတွင်း စစ်ကောင်စီဘက်မှ ၂၅ဦးထက်မနည်း သေဆုံးခဲ့ကြောင်း၊ စစ်ကောင်စီတပ်ဘက်မှ လည်း လက်နက်ကြီး လက်နက်ငယ်များဖြင့် ပစ်ခတ်ခဲ့၍ PDF ရဲဘော်များ အထိအခိုက်မဖြစ်စေရန် ဘေးလွတ်ရာသို့ ပြန်လည်ဆုတ်ခွာခဲ့ကြောင်း ဖော်ပြထားသည်။ အသေးစိတ်သတင်းများကို ဆက်လက်တင်ပြသွားမည်ဟုလည်းဆိုသည်။
ပုလဲ PDFသည် စက်တင်ဘာ ၃၀ရက်ကလည်း ပုလဲမြို့နယ် လက်ပုကန်ရွာနှင့် နှောကန်ရွာ အကြား ပုလဲ-ဂန့်ဂေါ လမ်းမတွင် စစ်ကောင်စီတပ်၏ ယာဉ်တန်းကို မိုင်းခွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၀ဦးခန့် သေဆုံးခဲ့သည်ဟု ထုတ်ပြန်ထားသည်။
Public Service Announcement
