ကချင်ပြည်နယ် အခြေစိုက် မြောက်ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ်ကိုကိုမောင် အပါအဝင် အရာရှိ ၇ဦးထက်မနည်းကို စစ်ကောင်စီတပ်က ဖမ်းဆီခဲ့ပြီးနောက် တိုင်းမှူးသစ်အဖြစ် စစ်ကိုင်းတိုင်းကလေးမြို့ အခြေစိုက်အမှတ်(၁၀)စစ်ဆင်ရေးကွပ်ကဲမှူဌာနချုပ်(စကခ-၁၀)မှ ဗိုလ်မှူးချုပ် စိုးလှိုင်ကို ယခုရက်ပိုင်းအတွင်း တာဝန်ပေးလိုက်သည်ဟု ကချင်ဒေသသတင်းရင်းမြစ်က ပြောသည်။
မြောက်ပိုင်းတိုင်း စစ်ဌာနချုပ် တိုင်းမှူး၊ တပ်မ(၃၃) တပ်မမှူး၊ ဒုတပ်မမှူး၊ တပ်မ(၈၈) တပ်မမှူး၊ ကချင်ပြည်နယ်လုံခြုံရေးနှင့် နယ်စပ်ရေးရာဝန်ကြီးတို့ အပါအဝင် စစ်ကောင်စီအရာရှိ ၇ဦးကို ဇူလိုင် ဒုတိယ ပတ်တွင် စစ်ကောင်စီက ဖမ်းဆီးခဲ့ခြင်းဖြစ်သည်ဟု သတင်းရင်းမြစ်များက ပြောသည်။ ဖားကန့် ကျောက်စိမ်းလုပ်ကွက်များသို့ တင်သွင်းသည့် ယမ်းများကို ခွင့်ပြုခဲ့ရာ ယင်းယမ်းများသည် စစ်ကိုင်းတိုင်းရှိ ပြည်သူ့ကာကွယ်ရေးတပ်(PDF)များထံ ရောက်ရှိသွားခြင်းနှင့် သက်ဆိုင်သည်ဟု သတင်းရင်းမြစ် အချို့က ပြောသည်။
“အပြောင်းအလဲတော့ လုပ်တယ်။ စကက ၁၀ က ဗိုလ်မှူးချုပ် စိုးလှိုင် ကို ချိန်းသွားပြီ။ ဒါက တိုင်းမှူးမရှိတော့ဘူးဆိုတော့ တိုင်းမှူး အစားလာတာပေါ့။ အရင်တိုင်းမှူးကိုတော့ အရေးယူတဲ့ ပုံစံဖြစ်သွားတာပေါ့” ဟု ကချင်သတင်းရင်းမြစ်က ပြောသည်။
မပခ ယခင်တိုင်းမှူးဗိုလ်ချုပ်ကိုကိုမောင်သည် အာဏာသိမ်းခေါင်းဆောင် ယုံကြည်အားထားခံရသူတစ်ဦးဖြစ်ပြီး ၊ ပြည်သူအများစုအပါအဝင် လူ ၆၀ ကျော်သေဆုံးစေခဲ့သော ဖားကန့်အနန့်ပါကိုလေကြောင်းတိုက်ခိုက်မှုတွင် အဓိကတာဝန်ရှိသူဟု စစ်ရေးလေ့လာသူအချို့က သုံးသပ်သည်။
Public Service Announcement
ဗိုလ်မှူးချုပ်စိုးလှိုင်မှာလည်း စစ်ကိုင်းတိုင်းတွင် ပြည်သူများ၏ နေအိမ်သောင်းချီ မီးရှို့အကြမ်းဖက်မှူတွင် အဓိကစေခိုင်းသူများထဲမှ တစ်ဦးဖြစ်ကြောင်းစစ်ရေးသတင်းရင်းမြစ်အချို့ကပြောသည်။
တိုင်းမှူးအပြောင်းအလဲ ဖြစ်သော်လည်း စစ်ရေးအပေါ် သက်ရောက်မှု တစုံတရာမရှိနိုင်ဟု စစ်ရေးသတင်းရင်းမြစ်တစ်ဦးကသုံးသပ်သည်။
“ဒါက သူတို့ အတွင်းရေးကိစ္စ” ဟု ကချင်သတင်းရင်းမြစ်က ပြောသည်။
လတ်တလောတွင် ကချင်ပြည်နယ် ဝိုင်းမော်မြို့နယ်နမ့်ဆန်ယာန်ဒေသ အနီးတဝိုက်၌ တိုက်ပွဲများ ပြင်းထန်လျက်ရှိသည်။
ဇူလိုင်လဆန်းမှစ၍ တိုက်ပွဲများ ဖြစ်ပွားခဲ့ရာ စစ်ကောင်စီတပ်မှာသေဆုံးထိခိုက်မှုများနေပြီး ဇူလိုင် ၂၁ ရက်ညပိုင်းတွင် စစ်တပ်ကလေကြောင်းမှ ဗုံးကျဲခဲ့သည်။
