နာမည်ဆိုးနဲ့ကျော်ကြားနေတဲ့ ပဲခူး ဒိုက်ဦးအကျဉ်းထောင်မှာ နိုင်ငံအကျဉ်းသား ၈ ဦး ဟာ၂ ပတ်နီးပါးကြာ တိုက်ပိတ်ခံနေရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်ထံကသိရပါတယ်။
ပြီးခဲ့တဲ့ ဇူလိုင်လ ၂၅ ရက်နေ့ကနေ ဒီနေ့ထိတိုင် တိုက်ပိတ်ခံထားရတာပါ။
ဇူလိုင်လ ၂၅ ရက်က ထောင်ပိုင်လေးဆိုသူဟာအဆောင်တွေကို စစ်ဆေးချိန် နိုင်ငံရေးအကျဉ်းသား ကိုဖြိုးအောင် ပုံစံထိုင်တာ မှားယွင်းတယ်ဆိုပြီး ရိုက်နှက်ကာ တိုက်ပိတ်ခဲ့တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်က ဖော်ပြပါတယ်။
” သူ့ကိုပမာမခန့်လုပ်တယ်ဆိုတဲ့ပုံစံမျိုးနဲ့ ရိုက်နှက်တိုက်ပိတ်လိုက်တာ”လို့ ကွန်ရက်ရဲ့ တာဝန်ရှိသူ ကိုသိုက်ထွန်ဦးက ဆိုပါတယ်။
Public Service Announcement
ဒီဖြစ်ရပ်ကို မကျေနပ်လို့ နိုင်ငံရေးအကျဉ်းသား ၇ ဦးက ထောင်အာဏာပိုင်တွေကိုသွားရောက်ပြောဆိုရာမှာ အဲဒီ ၇ ဦးကို လည်းရိုက်နှက်ပြီး တိုက်ပိတ်လိုက်တာပါ။
တိုက်ပိတ်ခံရသူ ၈ ဦးထဲမှာ ၃ ဦးဟာ အင်းစိန်ထောင် စစ်ခုံရုံးကနေ ထောင်ဒဏ် တစ်သက်တစ်ကျွန်းချခံရပြီး ထောင်ပြောင်းလာသူတွေဖြစ်ပါတယ်။
ဒိုက်ဦးထောင်ဟာ ပြီးခဲ့တဲ့ လပိုင်းအတွင်း နိုင်ကျဉ်းတွေကို ထောင်ပြောင်းမယ်ဆိုပြီး အပြင် ခေါ်ထုတ်သွားပြီး လမ်းမှာ ထွက်ပြေးလို့ဆိုကာ ပစ်ခတ်သတ်ဖြတ်မှုတွေ ဖြစ်ပွားခဲ့တဲ့ အကျဉ်းထောင်လည်းဖြစ်ပါတယ်။
