ချင်းတွင်းမြစ်ကြောင်းအတိုင်းဆန်တက်ပြီး မင်းကင်းမြို့သို့ ရောက်ရှိနေသည့် စစ်ကောင်စီရေယာဥ်အုပ်စု ရိက္ခာပြတ်တောက်နေပြီး မြစ်ကမ်းဘေးရှိ ကျေးရွာအချို့အား စစ်ကြောင်းထိုး ရိက္ခာစုဆောင်းနေကြောင်း တော်လှန်ရေးအင်အားစုများက ပြောသည်။
စစ်သင်္ဘောရေယာဉ် ငါးစီးပါ စစ်ကြောင်းသည် မင်းကင်းမြို့နယ်အတွင်း ဩဂုတ် ၁၅ရက်တွင် ဝင်ရောက်လာပြီး ဩဂုတ် ၁၉ရက်တွင် ထမောင်း၊တောင်ပတ်နှင့် အူကျေးရွာတို့ကို ဝင်ရောက်စစ်ကြောင်းထိုးနေကြောင်း မင်းကင်းမြို့နယ်မှ ပြည်သူ့ကာကွယ်ရေးထောက်ပို့ ရဲဘော်တစ်ဦးက ပြောသည်။
“ဝင်လာတဲ့ စစ်ကြောင်းမှာ ရိက္ခာပြတ်တယ်လို့ ကြားတယ်။ လူဦးရေးလည်းများတယ်။ သင်္ဘောပေါ်ကဆင်းပြီး စစ်ကြောင်းထိုးပြီး ရိက္ခာစုနေတယ်”ဟု အထက်ပါ ထောက်ပို့ရဲဘော်ကပြောသည်။
စစ်ကောင်စီစစ်ကြောင်းကြောင့် အထက်ပါ ကျေးရွာသုံးရွာမှ ဒေသခံများမှာ ဘေးလွတ်ရာ ထွက်ပြေးနေကြရသည်။
Public Service Announcement
စစ်ကောင်စီ မြေပြင်စစ်ကြောင်းများမှာလည်း ယနေ့(ဩဂုတ် ၂၀ရက်)အထိ ရှိနေသေးကြောင်းသိရသည်။
မင်းကင်းမြို့နယ်သို့ရောက်နေသော စစ်ကောင်စီရေယာဉ်အုပ်စုသည် ယင်းမာပင်နှင့် ကနီးမြို့နယ် ဖြတ်ကျော်စဉ် ရေကြောင်းမှရော ကုန်းကြောင်းမှပါစစ်ကြောင်းထိုးခဲ့သည်။ အင်အား ၃၀၀ခန့်ပါပြီး စစ်လက်နက်ပစ္စည်းများ တင်ဆောင်လာကြောင်း၊ ကလေးဝမြို့အထိ ဆန်တက်နိုင်ကြောင်း တော်လှန်ရေးအင်အားစုများက သုံးသပ်ထားသည်။
စစ်ကောင်စီရေယာဉ်များရှိနေစဉ် ပြည်သူပိုင်မော်တော်ရေယာဥ်များအနေဖြင့် ချင်းတွင်းမြစ်အတွင်း မောင်းနှင်သွားလာခြင်း မပြုကြရန် ပြည်သူ့ကာကွယ်ရေးတပ်ဖွဲ့များက သတိပေးထားသည်။
