ကရင်နီ(ကယား)ပြည်နယ်၊ ဒီးမော့ဆိုမြို့နယ်တွင် စစ်ကောင်စီက တပ်ရင်း ၁၁ရင်းအထိ အသုံးပြု ထိုးစစ်ဆင်လျက်ရှိကြောင်း ကရင်နီအမျိုးသားများကာကွယ်ရေးတပ်(KNDF)ဗျူဟာအမှတ် (၆) စစ်ရေးချုပ် ခူးရီးဒူက ပြောသည်။
ထို့ကြောင့် ခံစစ်အသွင်ဖြင့်ရင်ဆိုင်နေရပြီး ပြန်လှန်ထိုးစစ်ဆင်နိုင်ရန် “ကရင်နီပြည်ရောက် မအလ ‘တပ်မ’ ပျောက်” ကျပ်သိန်းတစ်သောင်းရရှိရေး ကမ်ပိန်းကို ယနေ့(သြဂုတ် ၂၃ရက်)တွင် စတင် ကြောင်း ၎င်းက ဆိုသည်။
“ဘာကြောင့် ဒီကမ်ပိန်းကိုစတင်လုပ်ဆောင်ရသလဲဆိုရင် ကရင်နီပြည်သည် တစ်နိုင်ငံလုံးမှာရှိတဲ့ တခြားသောနေရာဒေသတွေနဲ့ နှိုင်းယှဥ်ကြည့်ရင် စစ်ရေချိန်က အမြင့်ဆုံးအနေအထားမှာရောက်ရှိနေပါတယ်။အဲဒီထဲမှာမှ ကျွန်တော်တို့ လက်ရှိ ဒီးမော့ဆို ဗျူဟာ(၆)နယ်မြေအတွင်းမှာဆိုရင် စစ်ကောင်စီဘက်က တပ်ရင်း ၁၁နဲ့ တိုက်ခိုက်နေတာရှိတယ်။အဲဒီအတွက်ကြောင့် ကျွန်တော်တို့ကာကွယ်ရေးအဖွဲ့တွေဘက်က ကျည်အများအ ပြားလိုအပ်လျက်ရှိတယ်။အခု လက်ရှိမှာလည်း ကျွန်တော်တို့တွေက ခံစစ်အနေအထားမှာရှိ နေတယ်။ခံစစ်ကနေ တန်ပြန်တိုက်စစ်တွေ၊ထိုးစစ်တွေ စတင်နိုင်ဖို့ ဖြစ်တယ်”ဟု ခူးရီးဒူက ရှင်းပြသည်။
ကမ်ပိန်းမှ ရရှိလာသမျှကို ကျည်ဖြည့်တင်းမည် ဖြစ်ကာ ခုခံစစ်မှ တိုက်စစ်များဖွင့်မည်ဟုလည်း အသိပေးသည်။
Public Service Announcement
ယခုကမ်ပိန်းကို ပြည်သူများအနေဖြင့် တက်အားသရွေ့ပါဝင်ပေးကြရန်လည်း KNDF ဗျူဟာအမှတ်(၆)စစ်ရေးချုပ်က မေတ္တာရပ်ခံသည်။
နယ်မြေခံ တပ်မ(၅၅)အပါ တပ်မ(၆၆) ၊ တပ်မ (၂၂) ၊တပ်မ (၉၉)အစရှိသည့် တပ်မလေးခု အပြင် အမှတ် (၂ )စစ်ဆင်ရေးကွပ်ကဲမှုဌာနချုပ် (စကခ -၂) လက်အောက်ခံတပ်ရင်းများပါ အသုံးပြု၍ ကရင်နီပြည်နယ်သို့ ဖေဖော်ဝါရီလအကုန် မတ်လဆန်းကစ၍ စစ်ကောင်စီက ထိုးစစ်ဆင်ခဲ့သည်။
“ဒီးမော့ဆိုမှာက အနောက်ခြမ်းဘက်မှာ ပြင်းထန် တိုက်ပွဲမရှိသေးပေမယ့် စစ်ကောင်စီတပ်စွဲထား တဲ့ ကုန်းသာတို့ နန်းမယ်ခုံတို့ဘက်မှာ ထိတွေ့မှု ရံဖန်ရံခါရှိတယ်။အရှေ့ဘက်မှာဆိုရင်တော့ တိုက်ပွဲက ပြင်းထန်နေဆဲပဲ”ဟု KNDF တာဝန်ရှိသူက လူထုနွေဦးသို့ ပြောသည်။
မြေပြင်စစ်ရေးအချက်အလက်များအရ ယခုနှစ် မေလဆန်းပိုင်းကစ၍ ဒီးမော့ဆိုဒေသတိုက်ပွဲများတွင် စစ်ကောင်စီက ခမရ(၅၁၆၊ ၅၁၅) ၊ ခလရ (၁၂၊၁၄၊ ၈၀)၊ ခမရ(၁၁၂)နှင့် ခလရ (၃)တို့ကို အသုံးပြုခဲ့သည်။
