လက်နက်ခဲယမ်းများ သိမ်းဆည်းရရှိ
ကရင်နီ(ကယား)ပြည်နယ်၊ ဒီးမော့ဆိုမြို့နယ်တိုက်ပွဲအတွင်း စစ်ကောင်စီတပ် သေဆုံးမှုများပြီး လက်နက်ခဲယမ်းများလည်း သိမ်းဆည်းရရှိကြောင်း ကရင်နီစစ်ရေး သတင်းရင်းမြစ်များက ပြောသည်။
ယမန်နေ့(သြဂုတ် ၁၀ရက်) ဒီးမော့ဆိုမြို့နယ်တိုက်ပွဲ၌ မြေပြင်သေဆုံးသူများပြားသည့် စစ်ကောင်စီက လေကြောင်းဖြင့် တိုက်ခိုက်မှုပြုလုပ်ခဲ့သည်ဟု ဆိုသည်။
“အသေးစိတ်ကိုတော့ သက်ဆိုင်ရာတပ်ဖွဲ့တွေ ထုတ်ပြန်ပါလိမ့်မယ်။ကျွန်တော်တို့ ရရှိတဲ့အချက်အလက် ဓာတ်ပုံတွေအရတော့ စကစဘက်က စစ်ကြောင်းကို KA ၊KNDFနဲ့ PDFတွေ ပေါင်းတိုက်တယ်။စစ်ကောင်စီဘက်က အလောင်းတွေရော၊လက်နက်တွေရော အများအပြားကျန်ခဲ့တယ်။လေယာဥ်လာလို့ လက်နက်တချို့လောက်ပဲ ကျန်တယ်”ဟု ကရင်နီတပ်ပေါင်းစုနှင့် နီးစပ်သူက ပြောသည်။
Public Service Announcement
ယမန်နေ့က စစ်ကောင်စီ၏ လေကြောင်းမှ တိုက်ခိုက်မှုသည် နေ့လယ် ၂ နာရီခန့်ကစ၍ ၄ နာရီ ၁၅ မိနစ်ခန့်အထိ သုံးကြိမ်တိုင် တိုက်လေယာဥ် များ အသုံးပြု၍ ဗုံးကြဲခဲ့ကြောင်း ၎င်းက အသိပေးသည်။
“ဒီးမော့ဆို သဲတောင်ဒေသကို ကြဲတာ။လူအထိအခိုက်မရှိဘူး သိရတယ်။ဒီနေ့ မနက်အစော ၃ နာရီခွဲလောက်ကလည်း လေယာဥ်လာသေးတယ်”ဟု ကရင်နီစစ်ရေးသတင်းရင်းမြစ်က ရှင်းပြသည်။
သို့သော် ယမန်နေ့က ဒီးမော့ဆိုတိုက်ပွဲနှင့် ဆက်စပ်၍ သက်ဆိုင်ရာ တပ်ဖွဲ့များက ထုတ်ပြန်ခြင်းမရှိသေးပေ။
ဒီးမော့ဆိုမြို့အရှေ့ခြမ်းတွင်လည်း စစ်ကောင်စီက စစ်ကြောင်းသုံးခုဖြင့် ထိုးစစ်ဆင်ပြီးနောက် ယခုလ ၂ ရက်ကစ၍ တိုက်ပွဲမှာ နေ့စဥ်နီးပါး ဖြစ်ပွားခဲ့သည်။
ဒီးမော့ဆိုအရှေ့ခြမ်းတိုက်ပွဲတွင် စစ်ကောင်စီ၏ စစ်ကြောင်းသုံးခု၌ အင်အား ၃၀၀ထက်မနည်းရှိကြောင်းလည်း ကရင်နီပူးပေါင်းတပ်တာဝန်ရှိသူက လူထုနွေဦးသို့ ပြောထားသည်။
ဒီးမော့ဆိုအရှေ့ခြမ်းတိုက်ပွဲအရ စစ်ကောင်စီ သည် ဒီးမော့ဆို-ဖရူဆို လမ်းမကြီးကို ထိန်းချုပ်ရန် ကြိုးပမ်းနေခြင်းဟု ၎င်းက သုံးသပ်သည်။
တိုက်ပွဲဖြစ်ပွားရာ ဒေသနှင့်နီးစပ်သည့် ဒေါညင်းခူ – ထီးပေါ့ဆို လမ်းပိုင်း လုံးဝအသုံးမပြုရန် နှင့် ယာယီပိတ်ထားမည်ဟု KNDF က ထုတ်ပြန်ထားသည်။
