ပဲခူးမြို့တွင် ယနေ့(အောက်တိုဘာ ၆ ရက်)ညနေ၅နာရီကျော်က ဗုံးပေါက်ကွဲမှုဖြစ်၍ ပုဏ္ဍားစုရပ်ကွက် (၇)လမ်းနေ ရာအိမ်မှူးကိုကျော် ခြေထောက်ဗုံးစ ထိမှန်ခဲ့ကြောင်း ဒေသခံများက ပြောသည်။
“ရာအိမ်မှူးကိုကျော် အိမ်နားမှာ ဗုံးပေါက်တာပါ။ အုန်းခနဲအသံအကျယ်ကြီး ကြားလိုက်ရတယ်။ ကိုကျော်ရဲ့ ခြေထောက်ကို ဗုံးစတွေထိမှန်သွားတယ်လို့ သိရပါတယ်။ အခုတော့ ပဲခူးဆေးရုံကို ခေါ်သွားပါပြီ။ သူက ရပ်ကွက်ရာအိမ်မှူးဆိုပြီး စစ်ကောင်စီ သတင်းပေးဒလန် လုပ်နေတဲ့သူပါ။ ပြည်သူတွေကိုလည်း အတင်းဧည့်စာရင်းတိုင်ခိုင်းတာတွေ၊ ဧည့်စာရင်းကြေးဆိုပြီး ပိုက်ဆံတောင်းတာတွေလည်း လုပ်ပါတယ် “ဟု အခင်းဖြစ်ပွားရာ ရပ်ကွက်နေပြည်သူတစ်ဦးက ပြောသည်။
အဆိုပါ ပေါက်ကွဲမှုဖြစ်ပွားပြီးနောက် အကြမ်းဖက်စစ်ကောင်စီတပ်ဖွဲ့ဝင်များ ရောက်ရှိလာကာ မှော်ကန် (၁) လမ်းကျောင်းရှေ့၊ ပုဏ္ဍားစုကျောင်းရှေ့နှင့်ပန်းလှိုင်တာပေါ် တို့တွင် လမ်းများပိတ်ဆို့၍ စစ်ဆေးမှုများ ပြုလုပ်နေကြောင်း ဒေသခံများက ဆိုသည်။
ပြီးခဲ့သည့် အောက်တိုဘာ ၂ ရက်ကလည်း ပဲခူးမြို့ ပန်းခြံကုန်းရပ်ကွက်ရှိ ရပ်ကွက်အုပ်ချုပ်ရေးမှူးရုံး၌ ပေါက်ကွဲမှု ဖြစ်ပွားခဲ့ပြီး အုပ်ကြီးနှင့် ဧည့်စာရင်းလာတိုင်သူနှစ်ဦး ဒဏ်ရာရခဲ့သည်။
Public Service Announcement
