စာသင်​နေ​သောက​လေးငယ်များ ​လေ​ကြောင်းမှတိုက်ခိုက်ခံရပြီး​နောက် စစ်​ကောင်စီကိုလက်နက်​ရောင်းချမှုရပ်တန့်​ပေးရန်အပါအဝင်အချက် ၄ ချက်ကိုနိုင်ငံတကာထံ​တောင်းဆို

▪︎က​​လေးငယ်များ စိတ်ဒဏ်ရာရ​နေပြီး ​ကျောင်းသွားရန်​ကြောက်​နေကြ

ကလေးငယ်များ စာသင်ကြားနေသည့် စာသင်ကျောင်း တိုက်ခိုက်ခံရပြီးနောက် စစ်ကောင်စီသို့ လက်နက်တင်ပို့ရောင်းချမှုကို ရပ်တန့်ပေးရန် အပါအဝင် အချက်လေးချက်ကို စစ်ကိုင်းတိုင်း၊ ဝန်းသိုမြို့မှ ကျန်းမာရေးဝန်ထမ်း ဆရာမတစ်ဦးက နိုင်ငံတကာသို့ တောင်းဆိုလိုက်သည်။

ပြီးခဲ့သည့် စက်တင်ဘာလ ၂၇ရက်ကဝန်းသိုမြို့နယ်၊ ဂျိုးတောင်ရွာ၊ ဘူတာစုရပ်ရှိ ခန္တီဝံသာရာမ ဘုန်းတော်ကြီး စာသင်ကျောင်းအား စစ်ကောင်စီကလက်နက်ကြီးဖြင့်ပစ်ခတ်မှုကို အမျိုးသားညီညွတ်ရေးအစိုးရက ယနေ့ online မှတဆင့် သတင်းစာရှင်းလင်းပွဲပြုလုပ်စဉ်မြေပြင်မှ ကျန်းမာရေးဝန်ထမ်းဆရာမ ဒေါ်ဝင်းဝင်းက အထက်ပါအတိုင်း တောင်းဆိုခြင်းဖြစ်သည်။

“ကျွန်မအနေနဲ့ နိုင်ငံတကာကို တောင်းဆိုလိုတဲ့ အချက်လေး (၄) ချက်ရှိပါတယ်ရှင့်” ဟု ပြောရင်းနိုင်ငံတကာမှ စစ်ကောင်စီသို့ လက်နက်တင်ပို့ရောင်းချမှုကို ရပ်တန့်ပေးရန်၊ နိုင်ငံတကာအဖွဲ့အစည်းများ UN အပါအဝင် အိမ်နီးနားချင်း ASEAN နိုင်ငံများအနေဖြင့် Humanitarian Principles များကို လိုက်နာပြီး လူသားချင်းစာနာ ထောက်ထားမှု အကူအညီများကို လိုအပ်သူများထံတိုက်ရိုက်ရောက်ရှိအောင်ဆောင်ရွက်ပေးရန်၊စစ်ကောင်စီ၏ အကြမ်းဖက် လုပ်ရပ်များအတွက်တရားမျှတမှုကိုဖော်ဆောင်ပေးရန် နှင့်အလားတူ ဖြစ်ရပ်ဆိုးများထပ်မံမဖြစ်လာစေရေး နိုင်ငံတကာမှ ကူညီပေးရန် တောင်းဆိုခြင်းဖြစ်သည်။

စစ်ကောင်စီအား ထိထိရောက်ရောက်အရေးယူပေးရန် အမျိုးသားညီညွတ်ရေးအစိုးရ၊ ပြည်တွင်းနှင့် နိုင်ငံတကာ အဖွဲ့အစည်းများက တောင်းဆိုနေပြီးယခုအခါမြေပြင်မှဝန်ထမ်းတစ်ဦးကထပ်မံတောင်းဆိုခြင်း ဖြစ်သည်။

Public Service Announcement

အထက်ပါစာသင်ကျောင်းအား တိုက်ခိုက်မှုတွင် ကလေးငယ် ၂၁ဦး၊ ဆရာမ ၁ ဦး ဒဏ်ရာရခဲ့ပြီး ကလေးငယ် ၇ ဦးသည် ကုသနေရဆဲဟု အမျိုးသားညီညွတ်ရေးအစိုးရက ထုတ်ပြန်သည်။ ထို့အပြင် ကလေးငယ်များသည် စိတ်ဒဏ်ရာကြီးကြီးမားမားရရှိထားပြီး စစ်ကောင်စီအား ရွံရှာမုန်းတီးနေသည်ဟု ကလေးငယ်များအား စာသင်ကြားပေးနေသည့် ဆရာမ ဒေါ်မြမြက ပြောသည်။

ထို့အပြင် ဒဏ်ရာရကလေးငယ်များသည် စိတ်ဒဏ်ရာရရှိ​နေကြပြီးကျောင်းမတက်ရဲတော့ကြောင်း ပြောသည်အထိ စိုးရိမ်ထိန့်လန့်နေကြောင်း ဆရာမဒေါ်ဝင်းဝင်းကပြောသည်။

ခေါင်းဒဏ်ရာရသွား‌ သောကလေးတစ်ဦးသည် သူ့အိမ်၌ နေ့စဉ်လုပ်နေကြဖြစ်သော ပလပ်ပေါက်အား မီးကြိုးထိုးခိုင်းသည်ကိုပင် မလုပ်ရဲတော့ဟု ရှင်းပြသည်။ ကလေးငယ်တစ်ဦးသည် နှစ်ညဆက် အိပ်မပျော်ခဲ့သလို ကျောင်းသွားရန်လည်း ငြင်းဆန်​နေ​သည်ဟုသိရသည်။