ထန်တလန်မြို့တိုက်ပွဲတွင် ချင်းတော်လှန်ရေးရဲဘော်နှစ်ဦးကျဆုံး

ချင်းပြည်နယ်၊ ထန်တလန်မြို့တွင် တိုက်ပွဲပြင်းထန်နေပြီး အောက်တို့ဘာ ၁၂ ရက်တိုက်ပွဲတွင် ချင်းတော်လှန်ရေးရဲဘော်နှစ်ဦး ကျဆုံးခဲ့ကြောင်း ​ဒေသခံသတင်းရင်းမြစ်များကပြောသည်။

ကျဆုံးခဲ့သည့် ရဲဘော်များမှာ ချင်းအမျိုးသာတပ်မတော်-CNA မှတစ်ဦးနှင့် CDF-Hualngoramမှ ရဲဘော်တစ်ဦးတို့ဖြစ်သည်ဟု သိရသည်။

“မနေ့က ရဲဘော်နှစ်ဦးကျတယ်။ ဒဏ်ရာရသူတွေလည်းရှိတယ်”ဟု ချင်းတော်လှန်ရေးရဲဘော်တစ်ဦးကပြောသည်။

တိုက်ပွဲတွင်စစ်ကောင်စီတပ်ဘက်မှ ထိခိုက်​​သေဆုံးမှုအ​ခြေအ​နေကိုမူ အတည်မပြုနိုင်ခြင်းမရှိသေးကြောင်းလည်း၎င်းကဆက်​ပြောသည်။

Public Service Announcement

စစ်ကောင်စီတပ်က ထန်တလန်မြို့ကို ​အောက်တိုဘာ ၁၀ ရက်တွင်လေကြောင်းမှ ဗုံးကျဲတိုက်ခိုက်ပြီးနောက် စစ်ကောင်စီတပ်နှင့် ချင်းတော်လှန်ရေးတပ်များကြား ထို​နေ့မှစ၍ တိုက်ပွဲများဆက်တိုက်ဖြစ်ပွားခဲ့သည်။ ယ​နေ့(​အောက်တိုဘာ ၁၃)တွင် ဖုန်းနှင့် အင်တာနက်လိုင်းများ ပြတ်​တောက်​နေ၍ တိုက်ပွဲ ဖြစ်ပွားခြင်းရှိ ၊မရှိ ကိုမူ မသိရ​သေး​ပေ ။

စစ်ကောင်စီတပ်က အောက်တိုဘာ ၁၀ ရက် နေလည်ပိုင်းတွင် ထန်တလန်မြို့ကို ဂျက်ဖိုက်တာ နှစ်စီးဖြင့် ၈ ကြိမ်ဗုံးကြဲတိုက်ခိုက်ခဲ့ခြင်းဖြစ်သည်။ စစ်ကောင်စီတပ်က ထန်တလန်မြို့တွင်းရှိ ဆေးရုံနှင့် စာသင်ကျောင်းတိုကို ဦးတည်ပစ်ခတ်ခဲ့ခြင်းဖြစ်သည်ဟု ချင်းကာကွယ်ရေးတပ်ဖွဲ့ဝင်တစ်ဦးကပြောသည်။

ထန်တလန်မြို့ပေါ်တွင် စစ်ကောင်စီတပ်က အကြိမ်ကြိမ်ဗုံးကျဲတိုက်ခိုက်ပြီး ​နေအိမ်များကို မီးရှို့​နေ​သောကြောင့် ဒေသခံပြည်သူများက မြို့ကိုစွန့်ခွာထွက်​ပြေးခဲ့ကြရသည်။ထို​နောက်ထန်တလန်မြို့ပေါ်တွင် CDF-ထန်တလန်နှင့် စစ်ကောင်စီတပ်တို့သာ မြို့တဖက်စီတွင် တပ်စွဲထားခြင်းဖြစ်သည်ဟုလည်း ဒေသခံတစ်ဦးကပြောသည်။

ချင်းပြည်နယ်မြို့တော် ဟားခါးနှင့် ၂၅ မိုင်သာ ဝေးသည့် ထန်တလန်တွင် ၂၀၂၁၊ စက်တင်ဘာ ၁၈ ရက်က မြို့ပေါ်တိုက်ပွဲဖြစ်ခဲ့ပြီးနောက် စစ်ကောင်စီတပ်က ထန်တလန်မြို့ကို စတင်မီးရှို့ခဲ့ခြင်းဖြစ်သည်။