'/%3E%3C/svg%3E){kind=small}
ကရင်ပြည်နယ်ထဲ စစ်ကောင်စီခန့်အုပ်ချုပ်ရေးမှုးတစ်ဦး သေနတ်နဲ့ပစ်ခံရပြီးသေဆုံးသွားပါတယ်။
ဖာပွန်ခရိုင် ကမမောင်းမြို့မှာ ဒီကနေ့မနက်ပိုင်းက ဖြစ်ပွားခဲ့တာပါ။ အဲဒီ အုပ်ချုပ်ရေးမှူးကို ဆိုင်ကယ်နဲ့လူနှစ်ဦးက သေနတ်နဲ့ ပစ်ခတ်လို့ သေဆုံးသွားခဲ့တယ်လို့ မြို့ခံတွေရဲ့ ပြောကြားချက်အရ သိရပါတယ်။
ဒီကနေ့ မနက် ၈ နာရီကျော်အချိန်က ဖာပွန်ခရိုင် ကမမောင်းမြို့ အမှတ် ၃ ရပ်ကွက် စစ်ကောင်စီခန့်အုပ်ချုပ်ရေးမှူးဖြစ်သူ ဦးသန်းအောင်ဟာ ဈေးကနေအပြန် နေအိမ်ရှေ့အရောက်မှာ လူနှစ်ယောက်က ဆိုင်ကယ်နဲ့ရောက်လာပြီး သေနတ်နဲ့ လေးချက်ပစ်ခတ်သွားခဲ့တာလို့ မြို့ခံတစ်ဦးက ပြောပါတယ်။
” ပြောပုံအရ မနက်ဈေးကိုလာပြီး အပြန်မှာ သူ့နောက်ကိုလိုက်လာတာ ။ သူ့အိမ်ထိရောက်ပြီးမှ ပစ်တယ်။ ပစ်ပြီးတာနဲ့ တောထဲဘက်ကို ပြန်ထွက်သွားတယ် ဆိုင်ကယ်နဲ့ ။ သူ့ကိုပဲမကျေနပ်တာလား တစ်ခုခုလား။ စကားများတာရှိတာလား လောလောဆယ်တော့မသိသေးဘူး။ သူ့အိမ်က တောရကျောင်းအဝင်ဘက်မှာ။ သေနတ်က တကယ့်အကောင်းစား။ အရာရှိတွေကိုင်တဲ့သေနတ်မျိုး။ ကျည်ဆံအခွံကို ကြည့်ပြီးပြောတာ။ သေနတ်က အသံတိုးတယ်။ ကပ်ပြီးတော့ ပစ်တာ” လို့ ကမမောင်းမြို့ခံတစ်ဦးက ဆိုပါတယ်။
Public Service Announcement
ကမမောင်းမြို့ပေါ်မှာ အခုလို စစ်ကောင်စီခန့် ရပ်ကွက်အုပ်ချုပ်ရေးမှူးတစ်ဦးကို သေနတ်နဲ့ လုပ်ကြံပစ်ခတ် သတ်ဖြတ်သွားတာဟာ ပထမဦးဆုံးအကြိမ်ဖြစ်တယ်လို့ မြို့ခံတွေရဲ့ ပြောကြားချက်အရ သိရပါတယ်။
ကမမောင်းမြို့မှာ အကြမ်းဖက်စစ်ကောင်စီရဲ့ ဗျုဟာတပ်စခန်းတစ်ခုရှိနေပြီး စစ်ကောင်စီလက်အောက်ခံ နယ်ခြားစောင့်တပ် အမှတ် ၁၀၁၄ တပ်ရင်းတည်ရှိရာမြို့လည်းဖြစ်ပါတယ်။
